Anti-Corruption Awareness Campaign neih a ni

Mizoram Lokayukta leh Mizoram Journalists' Association (MJA), Lunglei District te buatsaihin nimin khan Lunglei Sub-Hqrs. YMA Hall-ah 'Anti-Corruption Awareness Campaign 2024' neih a ni.

Anti-Corruption Awareness Campaign hi Mizoram Lokayukta Chairperson Lalmalsawma IAS (Rtd) chuan kaihruaiin India ramah hlemhletna leh eirukna (corruption) dona atan Lok Pal chu hun rei tawh tak atangin hman a lo nih tawh thu leh State-ah chuan Lokayukta hman ve thung a nih thu sawiin, Mizoram-ah pawh March ni 11, 2019 khan Lokayukta hi din tan a ni, a ti a. Mizoram Lokayukta chu Member awm thei turte awm kim tawhin, thawktu lamah erawh duhthusamin a la famkim lova, zawi zawiin thuamchak mek zel a ni, a ti bawk.

Mizoram Lokayukta Member Joel Joseph Denga MJS (Rtd) chuan kan ram hma lam hun atan corruption do chu a pawimawh thu leh Dik taka tih leh dik taka nun chu Pathian duh dan a nih avangin ringtute tan phei chuan Corruption do chu kan mawhphurhna leh tihmakmawh a nih thu a sawi a. Lunglei DC R. Lalthazuala pawhin Mizoram-a eirukna leh hlemhletna dona kawnga hma la tur Lokayukta-in a taka tha taka hna an thawk thei ta chu a lawmawm a tih thu a sawi bawk.

Mizoram Lokayukta-a Assistant Public Prosecutor R. Laltharliana chuan he hunah hian corruption awmzia leh ram tana nghawng tha lo a neih dan te bakah, a dona kawnga hmalak dan tur leh corruption do tura Official, NGO leh khua leh tuite mawhphurhna a zirtir a. Mizoram Lokayukta in case 65 an neih tawh atangin case 44-ah Preliminary Enquiry tih tawh a nih thu leh mi pathum thiamloh chantir an nih tawh thu a tarlang bawk.