AMC in hma la chho mek

Aizawl Municipal Corporation (AMC) chuan Aizawl khawpui fai leh thianghlimna turin Mizoram Municipalities Act 2007 leh AMC Solid Waste Management Bye-Laws 2019 hmangin hma an la mek.

AMC tarlan danin kar kalta chhung khian Tui luankawra bawlhhlawh paih pawisa chawi tir mi 2 an awm a, Phal lohna hmuna leivung paih vanga pawisa chawitir mi pakhat, Septic Tank enkawl tha lo leh Soakpit tel lo a Septic Tank hmang siamtha tura hriattir mi 24 an awm bawk a ni. Heng bakah hian midang tana rimchhia leh hnawksak a Vawk vulh chhungkaw 1 chu huntiam chhunga an Vawk tiral tura hriattirna lehkha pek a nih bakah tuichhe luanna fel lo chhungkaw 4 te pawh an tuichhe luanna siam tha nghal tura hriattir an ni bawk.

AMC chuan Central Pollution Control Board thuchhuah leh Plastic Waste Management Rules 2016 te bawhzuiin AMC Plastic Waste Management Bye-Laws 2019 a siam a. Heng dan te hnuaiah hian hman phal loh Hman khat daih plastic (Banned Single Use Plastic) te tirem turin hma a la mek bawk a. Kar kalta chhung khan Banned SUP hi kg. 72 man a ni bawk. AMC chuan Faina leh thianghlimna leh Single Use Plastic hman khap chungchangah kan hriselna atan leh kan leilung venhimna turin kaihhruaina te ngai pawimawh turin mitin a ngen a ni.