Intensified IEC Campaign - India Fight Against HIV & STI chu Mizoram-ah thla hnih chhung neih a ni dawn

HIV leh Sex atanga inkaichhawn natna, STI (Sexually Transmitted Infection) chungchang mipui hnena zirtirna beihpui thlakna tur, Intensified IEC Campaign- India Fight Against HIV & STI chu Mizoram-a thla hnih (2) chhung kalpui turin nimin khan Chief Minister Lalduhoma chuan a hawng.

Vaivakawn YMA Hall-a he Campaign hawnna hunah hian Chief Minister chuan heng natna pahnih hi nunphung vanga natna ve ve an ni tih sawiin, “HIV bik hi vanduai vanga kai theih a ni nain chutianga kai chu an tam lo. Mizoram-a kai zaa 60 te hi mipat hmeichhiatna Condom tel lova hman vanga kai an ni a, a dang zaa 30 hi ruihhlo ti thin te an ni,” a ti a. Tunah hian MSACS chuan HIV kai mi 16,217 vel an enkawl mek thu leh HIV natna kai hmuhchhuah, an chin hriat zui si loh hi mi 633 an awm thu sawiin, “Heng an chin kan hriat zui loh kan thian te hi kan ngaihtuah hle mai a, an hnaih ber ART Centre lo pan theuh turin ka ngen a ni,” a ti a. “HIV hi kan do hneh thuai theih nan a kai mek kan hmuhchhuah zung zung a ngai a, inringhlel kan lo awm a nih chuan rang takin in-test ang u. Baseline Investigation tihna sum pawh hi Mizoram sawrkarin kan tum tawh dawn a ni. Mi a inhriatchhuah rana ART damdawi tha taka a lak bawk chuan rei tak a dam zui thei,” a ti bawk.

Chief Minister chuan Nu, HIV kaiin nau a hrin pawhin enkawlna tha tak dawng chunga nau a pai chuan a fa kha a him thei tih pawh sawiin, nikum chhung pawh khan chutiang naupiang 120 kan neih zinga 118 te chu HIV lakah an fihlim tih a sawi a. NACO lamin an chhut danin Mizoram a puitling zaa 2.73 te hi HIV kai thei dinhmuna ding mekah min ngai tih pawh sawiin, “Kan dinhmun hi a him lo hle. Chuvang chuan kan tan tlan a ngai a, Kohhran, Tlawmngai Pawl, Association leh mimal tinte hmalakpuiah ka sawm a ni,” a ti a. “Kan punkhawmna ah i sawi uar hram hram ang u. Kohhran leh Tlawmngai Pawl te tel lo chuan engmah kan tithei lo tih kan hria a, YMA phei chu kan innghahna a ni,” a ti bawk.

Intensified IEC Campaign- India Fight Against HIV & STI hawnna hun hi Health Department changtu Secretary Sangchhin Chinzah chuan kaihruaiin he campaign hi September leh October thla chhung hian kalpui a ni dawn a. Nimin a a hawnna hunah hian Health Minister Lalrinpuii chuan ruihhlo in Mizoram min run nasat thu leh a Injection zingah Middle School zirlaite pawh an awm tih hmuhchhuah a nih thu a sawi a. “State Council on AIDS te tuai thar lehin MLA zawng zawngte pawh he hmalaknaa hman tangkai kan tum a, Kohhran leh Tlawmngai Pawl te pawh nasa zawka thawhpui kan tum a ni, a ti bawk.