Serchhip atanga chhim lam-a NH. 54 kawngpui siam mek Bawrhsap in a hmunah a enfiah
Serchhip District Bawrhsap hian nimin khan Serchhip atanga chhimlam-a National Highway laihzauh leh siamthat hna thawh mek te hi a hmunah tlawhin a enfiah a, National Highway laihzauh hna enkawltu National Highway Infrastructure Development Limited (NHIDCL) hotute leh Contractor te bakah khawtlang hruaituten lo dawngsawngin, an hna thawh tawh chin dinhmun leh harsatna an neih leh an thawh chhunzawm dan tur ruahmanna te an lo hrilhfiah a. NH-54 kawng siam mekah hian Serchhip atanga chhimlam Serchhip District chhung Bungtlang, Keitum leh Serchhip Sailiam Kawn inkarah kawng siam la zawhfel lohna hmun 13 te chu Bawrhsap hian tlawhin, Kawng siam hi zawhfel thuai thuai a nih theih nan chak taka hmalak a nih mek laiin kawng siamna dal-a In lo la awm te awmin, a then te chu zangnadawmna la tawh chung si a In lo sa leh te, anmahni In kawt-a Waiting Shed sak rem ti lo te an awm a. DC leh amah tawiawmtute hian heng chhungkua te hi anmahni chenna In ngeiah dawrin an harsatna tawh dan te an sawipui a. Buaina leh harsatna awm lo a huntiam chhunga thiat turin a hriattir a. Sawrkar tha chakna hmanga tihluihnaa nawrchhiat sak ngai lo a, hun an pek belh chhunga thiah ngai ang ang te thiat fel turin Bawrhsap chuan a ngen a ni.
Serchhip District chhunga NH-54 laih-zauh leh siamthat hna thawktu NHIDCL leh an hnuaia Contractor KRAM Infracon Pvt. Ltd. te nen hian karleh-ah Review Meeting neih tum a ni a, he hunah hian an hmalak dan leh hmachhawp te sawiho a ni leh dawn a ni. District Administration hian NH-54 chungchangah hian tum engemaw zat thutkhawm an lo ko tawh thin a, Serchhip District mipui te hamthatna tur ngaih-tuahin Contractor te tih tur bituk a lo pe fo tawh a. Serchhip DC Paul L.Khuma chuan nimin-a heng hmun a tlawhnaah hian NHIDCL ten tha taka an tih tur an lo tih avang leh hna an thawh that avanga lawmawm a tih thu a sawi a ni.
He hunah hian Bawrhsap hi SDC Dr C. Vanlalchhanhimi chuan a tawiawm a ni.
Comments
Post a Comment