Myanmar atanga bungraw lut a mumal lo zui zel

Myanmar atanga lakluh thin bungraw chi hrang hrang a kal mumal theih loh avangin Zokhawthar leh Myanmar lama Khawmawi a Puakphurtu leh dawrkai bakah lirthei hmanga eizawngtuten harsatna an tawk mek.

Zokhawthar atanga thudawn danin, kumin June ni 8-a Teddim leh Zokhawthar inkara Run Lei bomb chhiat a nih hnuah Tahan leh Zokhawthar inkarah nitin mamawh leh sumdawnna bungrua lakluhna atana kawngpui hman lar ber chu hman mumal theih a nih loh avangin Tahan atangin Chin Hills-a Falam kaltlangin bungrua hi Mizoram pana phurh thin a ni a; he kawngpuiah hian ni 3 lai te kawng laka thang a ngaih avangin bungraw lo thleng ang ang te chu tunhma aiin a man a sang chho vek tawh a; Ni khata bungraw thleng thin kha tunah chuan kar khat velah a thleng thin a. Hei vang hian bungraw thenkhat chu a chhe hman thin a, sumdawng ten harsatna nasa tak an tawh phah a ni.

Zokhawthar Transport Union Secretary chuan Customs ten July ni 25 atang khan Mizoram-a bungraw phurhluh an phallo tih sawiin, nitin a Zokhawthar atanga bungrua chhuak hi LPK trip hnih ang vel chauh a ni tawh a, hetihlai hian Zokhawthar-a Mutia mi 400 vel chuan hnathawh tur an hmu mumal ta lo a ni. Tun dinhmunah Myanmar atanga bungraw theng a awm mumal loh avangin khualzin an tlemin, Taxi, thingpui dawr leh thil danga eizawngtute pawh nasa takin a nghawng chho mek a ni.