Mizoram-ah National Sports Day hman a ni

Nimin August 29, 2024 khan India rampum-ah ‘National Sports Day’ hman a ni a, Mizoram-ah pawh Sports Authority of India (SAI) State Training Centre, Mission Vengthlang-ah he ni pual hian hun hman a ni.

India rama Hockey khel thiam leh hmingthang Major Dhyan Chand-a piancham denchhena hman National Sports Day-ah hian kumin atan ‘Sports for the promotion of Peaceful and inclusive societies’ tih chu thupui atan hman a ni a, Sports Authority of India (SAI) State Training Centre, Mission Vengthlang-a hun hman hi Sports & Youth Services Department changtu Secretary Lalramsanga Sailo chuan khuallian nia hmanpuiin Sports chu mihringte indaidanna thiattu, remna leh inpumkhatna atana hmanraw pawimawh a nih thu sawiin, Hriselna leh infiamna hi thil kalkawp tlat, mimal invawn nan leh ruihhlo do nan bakah rilru lam harsatna te hneh nan a tangkai thu a sawi a. Vision Olympic 2036 kalpui chhoh mek atan Sports lama thawktu zawng zawngte tangrual turin a sawm a ni.

National Sports Day puala hun hman hi Sports Department-a Joint Director C. Lalremsanga chuan kaihruaiin SAI-a Regional Director Lianminthang-a kaihhruaiin he ni puala thutiam chu chham rual a ni a. Infiamna chi hrang hrang, Mini Marathon leh Indigenous Games tel in hun hman chhunzawm nghal a ni a, heng infiamna chi hrang hranga titha te hnenah lawmman sem a ni bawk.