Mizoram kaltlanga nungcha tawlhruk man 166 tling

Myanmar lam atanga Mizoram kaltlanga nungcha tawlhruk man chhuah chu a vaiin 166 a tling tawh.

Mizoram sawrkar Environment Forest & Climate Change Department hnuaia Wildlife Division hotuten Akashvani Correspondent-an hrilh danin, Mizoram kaltlanga nungcha tawlhruk zingah hian Sazu chi khat, Guinea Pig a tam ber a, 20 lai man chhuah a nih bakah Vaki chi khat, Sulphur Crested Cockatoo leh Saphai, Ball Phython 18 ve ve te chu ramsa tawlhruk manchhuah zinga a tam ber pahnihna an ni.

EF&CC Wildlife Division hotute sawi danin nungcha tawlhruk te hi khawvel pum huap ang pawh a man to tak tak te an ni hlawm a, Mizoram chhungah tak chuan leitu an awm an hriat loh thu leh phai lama thawn tur an nih deuh vek thu an sawi a ni. 

Nungcha tawlhruk manchhuahte hi a enkawl danah Wildlife hotute chuan anmahni pawh an inzir belh thin bakah mithiam tam tak an rawn thin thu an sawi a, nungcha thenkhat chu a tawlhrutu ten chaw an pek that loh avang leh bawm chep tak taka an khung thin avangin an chauh thu leh a then phei chuan an thih phah hial thin thu an sawi a. Hetianga nungcha tawlhruk a hluar avang jhian Aizawl Sahuan pawh a chep phah thin thu leh nungcha tawlhrukte dahna tur pawh theih ang ang a ngaihtuah a nih thin thu sawiin, Aizawl Lungverh-a Mizoram Police ram pawh Aizawl Sahuan ram atan Mizoram Sawrkar chuan a sahthlak sak a, Sahuan a ramsa leh nungcha-te tan tui pawh a hma ai a tam lak a nih tawh thu an sawi bawk.