Serchhip atanga hmarlam-a NH. 54 siam mek Bawrhsap hovin a hmunah enfiah leh a ni
District Bawrhsap leh Competent Authority for Land Acquisition (CALA) Paul L. Khuma leh a Team te hi National Highway-54 zauh hna enkawltu National Highway Infrastructure Development Limited (NHIDCL) hotute leh Contractor te bakah khawtlang hruaituten an lo dawngsawng a. Mimal leh pawl in harsatna an neih te bakah tunhnai ruahsur nasa avanga hnathawh khaihlak te a hmunah an en a. Contractor te hian an hnathawh tawh chin dinhmun leh harsatna an neih te, an thawh chhunzawm zel dan tur ruahmanna te Bawrhsap hi an lo hrilh a ni.
Bawrhsap hian NH-54 kawng siam meka Serchhip District chhung Chhiahtlang, Chhingchhip, Khumtung leh Baktawng Chan In a kawng la siam zawh lohte leh tunhnaia ruahsur nasa avanga harsatna awmte enin, Kawng siam hi zawhfel thuai a nih theih nan chak taka hmalak a nih mek laia kawng siamna tikhaihlak thei thil awm te a hmunah a en a. Harsatna neite pawhin an harsatna te DC hnenah hian an lo thlen nghal bawk a ni.
National Highway-54 siamthat leh zauh hna thawh kal mekah harsatna awm te leh a chinfel dan tur ruahmanna sawihoin thutkhawm vawi engemaw zat neih a lo ni tawh a. District Administration tirhin kawngpui siam mek te endikin vawi engemaw zat vah chhuah a ni tawh thin bawk a. Nimin-a Serchhip DC Paul L.Khuma hoa fehchhuak Team te hian thutkhawm an neih tuma hmachhawp an neihte hlenchhhuah a ni em tih a hmunah an en a, contractor ten hna an thawh zawh hun tur siam felpuiin hmalak zel dan turte an sawiho nghal bawk a ni.
Hetihlai hian tunhnai ruahsur avanga Khumtung leh Baktawng Chan In inkar-a lemin in NH. 54 a hnawh thenfai hna chu thawh mek zel niin nimin khan lirthei kaltlang theih tura thenfai a ni a, helai hmuna lirthei tangkhang te pawh an chhuak tawh a ni.
Comments
Post a Comment