Mizoram thalai mahni kutkawih-a eizawn tumte tan kawl a eng dawn ta niin ZPM in an sawi

ZPM Party chuan Mizoram thalai mahni kutkawih-a eizawn tumte tan kawl a eng dawn ta nia sawiin, The Mizoram Ceiling on Government Guarantees (Amendment) Bill 2024 pawm a ni ta chu ropui an tih thu an sawi.

Nimin a thuchhuah an siamah ZPM Party chuan Mizoram Assembly 9-na thutkhawm vawi 3-na neih zawh takah Mizoram thalai mimal leh Company-te'n sumdawnna leh mahni kutkawih eizawnna kawnga ke an pen ve theihna tura loan pûk duhte tâna Guarantor-a sawrkar a tan ve theihna tur dân, The Mizoram Ceiling on Government Guarantees (Amendment) Bill 2024 Chief Minister-in a chhawp chhuak leh lungrual taka pass a ni churopui an tih thu an sawi a. Thalai mimal leh Company-te tâna Guarantor a sawrkâr a tan ve theihna tur dân siam hi tun hma atang tawha tuna kan Chief Ministe Lalduhoma'n a lo aupui tawh leh a lo intiamna a nih thu sawiin, “ZPM a sawrkâr hnu lawka a intiamna leh a au hla tihhlawhtlina a awm hi a thlamuanthlak kan ti a, mahni thutiam leh mahni au hla-a ding Chief Minister kan nei hi lawmawm kan ti,” an ti a. He dân siam thatah hian thalai zînga sum leh ro dahkham tur nei lo, mahni ke a dingchhuak tura a ngaihna hria leh taimakna neite tân zau taka kawng a inhawng chu lawmawm an tih thu pawh sawiin, “ZPM kaihhruai Mizoram sawrkâr chu mipuite sawrkâr a nihzia a lang chiang hle-ah kan ngai a ni,” an ti.

ZPM Party chuan The Mizoram Ceiling on Government Guarantees (Amendment) Bill 2024 hi Mizoram sawrkâr flagship programe, Bân-a kaih Policy (Handholding Policy) a hlawhtlin theihna tura kawng pawimawh tak a nih thu pawh sawiin, cheng nuai 50 chin loan-ah Guarantor a sawrkâr tan-te, Interest Free Loan pêkchhuah leh Special Package Loan pêkna tur ah te he dan hian kawng a rawn hawng tih an sawi a, “Miretheite thleng phâk dân kan nei ta a ni,” an ti a. “He dân siam that a move-na ah, party thliar lova a ngaihna hria leh mi taima te din chhuahna tura he ruahmanna hi siam anih thu Chief Minister-in huaisen taka a puang chhuak khan Zoram-ah mipui sawrkâr dik tak a lo ding ta a ni tih a nemnghet a, Mizoram thalaite tan a thlamuan thlak hle a ni,” an ti bawk.