Khua leh tui te harsatna chinfel sakna ni hman a ni

Nimin khan Lawngtlai-ah khua leh tuite ngaih-sak leh an harsatna chinfel ni, 'Citizen Care- Grievance Redressal Day' hman a ni.

Lawngtlai DC Office bultuma DC Conference Hall-a he hun hman hi Lawngtlai District Bawrhsap Cheemala Siva Gopal Reddy IAS chuan hmanpuiin khua leh tuite harsatna chinfel sak chu sawrkar Department zawng zawngte mawhphurhna a ni tih sawiin, mipuite tana thawk an nihna hre reng turin Deparment hrang hrangte chu a chah a. Mipuite tana hamthatna awm ang ang bakah an dikna chanvo humhalh leh mipuite mamawh pek kawngah Sawrkar hnathawkte chu rilru siam thar turin a chah bawk a ni.

Lawngtlai District chu District lian tak a nih avangin thingtlang lam atanga Office dawr thin ten sum leh pai tam tak bakah hun hlu tak an seng thin tih Bawrhsap chuan sawiin, an thil duh leh mamawhte an tihfel nghal mai loh phei chuan harsatna lian tak a thlen thin thu a sawi a. Awlsam leh hun khawhral lo zawnga an mamawh an tihfel zung zung theih nan he hun hi hman a nih thu a sawi bawk a. Hetiang ni hman hi thil pawimawh leh tangkai a nih thu sawiin, thlatin vawikhat neih thin a nih dawn thu leh hetiang hun hman a nih apiangin Department hrang hrang hotute tel ngei turin a chah bawk a ni.

'Khua leh tuite Ngaihsak-Harsatna Chinfel Ni' puala hun hman ah hian Department 15 - Police, PHE, P&E, PWD, Health & Family Welfare, Certificates under DC Office, Election Branch, Transport, Taxation, Supply Department leh Lawngtlai, Chawngte, Bungtlang South leh Sangau-a BDO te, District Research Officer (DRO), District Education Officer (DEO) I&PRO leh Lead Bank Manager (SBI) te chuan mipuite dawr theih turin dawhkan hrang hrangah inpho a, mipuite pawhin an hlutin dawrtu an thahnem hle a ni.