VC By-election neih tur atan hriattirna tichhuak ta

Serchhip District chhung Village Council pahnih a by-election neih tur atan nimin khan hriattirna tihchhuah a ni ta a, inthlan chuh tumte tana hming pekluh theih hun pawh hawn nghal a ni.

Mizoram District danga Village Council by-election neih ruala Serchhip Chhim Veng VC leh New Serchhip VC Seat ruak pakhat ve ve hnawhkhat tura by-election neih tur thu niminpiah-a State Election Commission in a tihchhuah hnuah nimin khan heng VC by-election neihna tura Returning Officer te chuan inthlan hriattirna hi an tichuak a, hemi rual hian inthlan chuh tumte tana hming pekluh hun pawh hawn nghal niin karleh Thawh-lehni, September 3, 2024 thlengin Nomination Paper thehluh theih a ni ang.

Serchhip Chhim Veng VC-ah hian VC Vice President nilai C. Laldinpuia a boral avangin General Seat pakhat a ruak a, by-election neih turah hian F. Lalhmangaihsanga chu Returning Officer a ni dawn a. New Serchhip North VC ah hian VC Member B. Zaruala a boral avangin General Seat pakhat bawk a ruak a, tun tuma by-election neih turah hian David Laldintluanga chu Returning Officer niin Inthlan chuh tumte tan hian Retuning Officer te hnenah hian Nomination Paper hi thehluh tur a ni ang.

August 27, 2020-a Village Council In-thlanpui neih a nih atangin VC dinglai te hian kum 4 term an hmang ta chiah a, Serchhip District ah VC  atana thlantlin boral an awm avangin tun tum hi by-election neih vawi thumna tur a ni.