Bairabi to Hortoki-ah Rel a tlan thei tawh

Bairabi leh Sairang inkar-a Rel kawng zau chi siam mekah Bairabi leh Hortoki inkar chu Rel tlan phal a ni tawh.

KM 51.31-a thui Bairabi leh Sairang inkar Rel kawng siam mekah hian Rel tlanna atana Rel kawng a him tawk leh him tawk loh endiktu, Ministry of Civil Aviation a Commissioner of Railway Safety Sumeet Singhal chuan KM 16.725-a thui Bairabi leh Hortoki inkar a endikna ah thutlukna siamin, Rel tlanna atan a him tawk a ni tih a finfiahna lehkha chu Ministry of Railways-ah Ningani khan a thehlut niin North East Frontier Railways (NFR) thuneitute chuan Zirtawpni khan thuchhuah siamin an tarlang. A endik hnua thutlukna a siamah Summet Singhal chuan helai Rel kawng hi mihring phur leh bungraw phur Rel tan zawh ngam a ni, a ti a ni.

NFR thuchhuah chuan Commissioner of Railway Safety hian thla hlui July thla tawp lam khan a endik hna hi a zo tawh niin an sawi a, Bairabi leh Sairang inkar Rel kawng siam hna hi tun dinhmunah za zela 90 an zo tawh niin an sawi bawk a. He Rel kawng hi hmun 4-ah thenin, Bairabi leh Hortoki inkar, Hortoki leh Kawnpui inkar, Kawnpui leh Mualkhang inkar leh Mualkhang leh Sairang inkar ti-a then a ni a. Helai Rel kawngah hian bungraw phur leh mihring phur chi Rel te chu darkar khata KM 75-a chaka tlan theihna turin a him tawk niin Commissioner of Railway Safety chuan a thu thehluhah a tarlang a ni.

Hetihlai hian Assam-a Hailakandi District-a ruah sur nasat lutuk chuan Silchar leh Bairabi inkar Rel kawng chu Killarbak hmunah a tichhia a, Rel kawng inghahna lei hi hnawlin Rel kawng hi metre 200 vel zeta thui a inkhai a, hei vang hian Mizoram-ah Rel a lut thei rih lo a ni.