Ruah la sur tam tura ngaih a nih avangin kuthnathawktute hriat tur pawimawh tarchhuak

Serchhip District tiamin Mizoram chhimlam District thenkhat ah naktuk, August 27, 2024 thleng hian ruah sur tam zual tura ngaih a nih avangin kuthnathawktute chu fimkhur tura chahin an hriattur pawimawh te sawrkar chuan a tarlang.
Hemi chungchanga Inrinni-a sawrkar thuchhuah chuan Bangladesh hmar lam-a thlivir insiam avangin tun ni 2 lo awm tur chhung hian Assam, Meghalaya leh Tripura-ah te ruahsur nual tura rin a ni a. Mizoram bikah chuan August ni 24 atanga 27, 2024 inkar chhung hian chhim lam Lunglei, Lawngtlai, Siaha, Mamit leh Serchhip District-ah te ruah tam zual tura ngaih a ni tih a tarlang a. He ruahpui sur avanga kuthnathawktute’n harsatna an tawh loh nan leh an lo inhmakhua lawk nan AgroMet Field Unit (AMFU), ICAR, Mizoram Center leh Directorate of Agriculture, Government of Mizoram; Meteorological Centre (Aizawl) leh District Agro-Met Unit (DAMU), KVK, Lengpui tangkawp chuan kuthnathawktute hriat tur hrang hrangte thuchhuah siamin an tarlang a ni.

Hemi chungchanga sawrkar thuchhuah chuan khaw chhiat laiin thlai chin te leitha pek leh hlo kahte tih loh tur a ni tih tarlangin, August ni 24 - 27 inkar chhung hian ruah a sur tam hmel avangin ruah surin thlai rah leh thei rahte a denchhiat loh nan Net hmangin emaw a theih chuan khuh hram a that thu an tarlang a. Leilet-ah tui a tam lutuk chuan luan chhuahtir tur a nih thu leh hmun zawla thlai chingte pawhin thlai hmuna tui a tlin loh nan tui luanna tur siam tur a nih thu te; ruah ala sur nual hmel avangin thlai hmuna tui a tlin loh nan tui luanna tur tha taka siam tur a nih thu tarlangin, tuiin lei a chim hian thlai zung tawih a awm duh thin thu leh thlai an thih phah thin thu te an tarlang a ni. Hei bakah hian Thei leh thlai rahte an huh hian a rit duh a, a zar an uai nat avangin a zarte a kurin a tliak duh thin tih pawh tarlangin, a zar te do that a pawimawh thu te; Tlangram buhte a vui chho tan tawh avangin ruah sur nasain a tih tluk loh nan mahni remchan danin lo inhmakhua tur a nih thu leh Ruah ala sur nual hmel avangin ruahtuiin lei hanna a kalral pui lutuk loh nan buhpawl emaw, hnim emaw in lei khuh tur a nih thu leh hei hien thlai tlu tur leh a zung lang turte a veng tih an tarlang a ni.

Heng bakah hian Sangha dil chhunga tuihawk a luh hian chirhdiak leh bawlhhlawhte a ken tel teuh thin avangin a luan luh lohna turin a bul velah tui luanna tur tha taka siam tur a nih thu te; Sangha Dil-a Tui a khah loh nan a luanchhuahna tur siam tur a nih thu leh he a luan hhuahna turah hian Sangha an chhuah loh nan net hmanga khuh tur a nih thu leh Khaw chhiat laia leitha pek vak leh Sangha chaw pek tam hian Dil chhunga oxygen a tlem phah thin avangin pek vak loh tur a nih thu te an tarlang bawk a ni.