Speaker Bangla cheina atan sum sen a tam - MNF

MNF Party chuan ZPM sawrkar hnuah Assembly Speaker Lalbiakzama Bangla cheithatna leh bungraw lei nan Rs. 23,40,000/- sen a nih thu leh Bangla cheinan bik Rs. 8,40,000/- sen niin bungrua (Sofa, dining table, doormat, etc.) lei nan nuai 15 sen a ni bawk niin an sawi.

Nimin-a thuchhuah siama an tarlan danin MNF Party chuan Chief Minister Lalduhoma'n sawrkarna an chan hlima thuthar lakhawmtute a kawmna ah Bangla chei nan sum hman vak vak tha a tih loh thu leh chutiang tih ve an tum loh thu a sawi nia tarlangin, “Chutiang a nih laia Speaker in a bangla Rs. 8,40,000/- laia a chei tir leh bungraw (Sofa, dining table, doormat, etc.) lei nan nuai 15 lai sawrkar pawisa a hmang hi a intuha lo hle a. Hei mai bakah hian Minister leh MLA dangte quarters pawh chei that a ni hlawm tih kan hria a ni,” an ti a. ZPM chu an sawi loh ang hlirin an awm tih hi chu tlang hriat a ni tawh nia sawiin, “Mipui pawhin ngaiah kan nei tawh a. Chutih laiin sum renchem leh sawrkar insawhngheh kumah an puang mek a. Anmahni ber a bawhchhetuah an tang zel mai hi a pawi hle a. Sum indaihlohna avangin Zoram pum kawng chhe em em pawh an siam thei lo a, sawrkar-in vaibelchhe telin sum a puk reng a. Chutih laia Bangla cheibawlna tura sum tam tak a luang hi a uiawm hle,” an ti bawk.