Mission Shakti hmalakna sawiho

District Level Implementing Committee on Mission Shakti chu nimin khan Serchhip-ah an Chairman leh District Bawrhsap Paul L. Khuma hovin an thukhawm.
District Hub for Empowerment of Women, Women & Child Development Department Serchhip District hmalaknaa Serchhip DC Meeting Room-a thutkhawm-ah hian James Lalremliana, District Coordinator, Poshan Abhiyaan leh District Programme Officer mawhphurhna la mektu chuan kalkhawmte lawmna thu sawiin, an hnathawh kalphungte a sawi a. District Hub for Empowerment of Women (DHEW) ten District Action plan an lo duan sa chu en ho niin, chak zawka hmalak a nih theih nan Line Department te nen lungrual tak a thawkho tura rua-hmanna siam a ni.

He thutkhawm ah hian Lalvensanga, District Mission Coordinator, Mission Shakti chuan Mission Shakti hnuaia an hmalakna hrang hrangte a sawi a, SAMBAL (Safety and Security) hnuaiah Serchhip District-ah hmeichhe naupangin zirna tha an neih a, enkawlna tha an dawn theih nana hmalakna BBBP (Beti Bachao Beti Padhao) te, hleilenna tuar hmeichhe tlukluhna tur One Stop Centre te leh Women Helpline (181) chu a mamawh apiangte tana biak theih a nih reng thu a sawi a ni.

Heng bakah hian SAMARTHYA (Empowerment) hnuaiah PMMVY kalpui niin kum 2024-2025 chhung hian mi 113 hnenah tanpuina pek an nih thu a sawi a. Hmeichhe baihvai, harsatna tawk, tlukluhna leh belh tur mumal nei lo te, hleilenna tuar leh belh tur mumal neilo ten an pan tur Shakti Sadan an neih thu leh National Creche Scheme (Palna) kalpuii niin, Serchhip Block-ah 9 leh East Lungdar Block-ah 6 a awm thu a sawi bawk a. Heng ah hian Sawrkar Department hrang hrangte nen tangkawpin hnathawh thin a nih thu sawiin Zirlaiten kawng hrang hranga hma an sawn theih nan hma an lak thu leh a bik takin Govt. High School Serchhip chu hmalakna atan an hman thu a sawi bawk.