Hleilenna tirem tura inzirtir tharna Ni hmanpui

Women & Child Devlopment Minister Lalrinpuii chuan Ruihtheih thil chu tharum thawhna leh hleilenna thlen tirtu pakhat a ni tih sawiin, “Kan tih rem phawt chuan heng thil hi engemawchen a ziaawm phah ngei dawn a ni,” a ti.

Mizoram Seventh Day Adventist hnuaia Womens Ministries ten Inrinni kalta-a Aizawl Millenium Centre kawt-a hleilenna tirem tura inzirtir tharna Ni an buatsaih a hmanpuina ah Social Welfare Minister chuan kan ram thenawm leh khawvel hmun dang dangah indona leh tharum thawhna, hleilenna chi hrang hrang a thlen mek bakah thihna thlen lem lo, mahni inchhung, hnathawhna hmun leh zirna In-ah hleilenna a thleng reng tih a sawi a. Mizoram-ah ngei pawh, a bikin hmeichhia, an hnathawhnaa an hotute atanga hleilennna tawk an awm fo a; zirlai zingah huaisen leh chak zawkin an aia naupang leh dawih zawk tih duhdah leh an hleilenna a tam em em tih a sawi a. “POCSO dan bawhchhiatna kan ngah tawh a, naupang hi aw nei lo, chhantu nei lo an ni fo thin a; dan kengkawhtu hrang hrang te hian heng tih bo tum hian hma an la reng a ni,” a ti.

He hunah hian Women & Child Development Department-a District Programme Officer (ICDS) Dr. Lalhruaitluangi Chhangte chuan naupang leh hmeichhiate chunga tharum thawh leh hleilenna laka dan awmte sawifiahin, tanpui ngaiten an pan tur leh hmalak theih dan a sawi a. Mizoram-ah hmeichhiate chu eizawnna leh khawtlang nunah zalen takin lang mah se, hleilenna lakah an fihlim ta tihna a ni lo tih a sawi bawk.