VC By-Election neih tur chungchangah Political party te zawm tur kaihhruaina tichhuak

State Election Commission Mizoram in thuchhuah a siam angin Serchhip-III (Chhim Veng) leh New Serchhip North Village Council huamchhung ah General Seat atan By-election buatsaih a nih dawn avangin hetiang hian Serchhip DC leh District Election Officer Paul L. Khuma chuan Political Party te zawm ngei turin thuchhuah a siam.

Campaign chungchang :

September ni 24, 2024-a Serchhip-III (Chhim Veng) leh New Serchhip North VC By-election neih tur atan Political party ten an campaign pui turin hmun dang atangin Campaigner chahluh theih a ni a. Inthlanna boruak felfai leh thianghlim tak a awm theih nan Vote thlak hun khar (close of poll) a nih atanga chhiar leta darkar 48, September ni 22, 2024 (Pathianni) tlai dar 5:00) hnulamah campaign phal a ni tawh lo. September ni 22, 2024 (Pathianni) tlai dar 5:00 hnulamah Serchhip III (Chhim Veng) leh New Serchhip North VC area chhunga campaign tura lut, VC Roll-a chuang si lo te cham ban phal a ni tawh lova, hemi hma hian VC area chu an chhuahsan ngei ngei tawh tur a ni.

Motor hman chungchang :

1) Inthlan ni-ah Polling Station-a voter te phurh nan motor hman phal a ni lo.

2) Inthlan ni (Poll day) ah Candidate leh an Agent te tan motor pakhat hman phalsak an ni a. He phalna hi RO hnenah ziakin an dil tur a ni. 

Inthlan ni-ah voter leh mipui vantlang rikrap thei tur hriamhrei leh silai lek emaw, phurh emaw phal a ni lo a. Hetiang ang hmanraw phur motor hi man a nih chuan motor hi man nghal tur a ni. Election zawh hma chuan hren tur a ni. A neitu pawh dan angin a chungah action lak a ni ang. 

Defacement of Public Property leh Banner zar chungchang :

1) Sawrkar building leh hmun chhungah banga thil ziah, Poster tar leh campaign-na lam hawi engmah tar emaw ziah lan emaw phal a ni lo.

2) Kawng kan/tan zawngin banner emaw, Gate emaw siam phal a ni lo.

3) He thu kalh zawnga Political Party emaw, Candidate emaw in hma an la a nih chuan District Election Officer in lathla tura tihna hriattirna a chhuah anga, a zawmlo a nih chuan dan anga hmalak tur a ni ang.

Common Election Camp :

ParIy worker-te inkara boruak tha lo pumpelh nan Polling Station bulah Political Party-te leh Candidate-te awmkhawm nan Common Election Camp pakhat chauh siam phalsak a ni a, he Camp hi mawlmang thei ang bera siam tur a ni. Flag te, Poster te, Symbol te leh thuziak, Political Party emaw, Candidate emaw lam kaihhnawih ziahna engmah tar loh tur a ni. He Camp-ah hian pawm tlan theih tu emaw in a ho ang.

Loudspeaker hman chungchang :

Campaign hun chhung hian Loudspeaker/Public Address System-te hman phal a ni lova, amaherawhchu, Candidate te emaw Political Party emaw ten Public Meeting/Rally te buatsaih an duh a nih chuan Loudspeaker hman phalna District Magistrate emaw, Sub-Divisional Magistrate te hnenah an dil thei ang.