Optic Fibre hmangin District Hqrs. te internet chak zawk pek tuma hmalak mek a ni

I&PR Minister Dr. Vanlalthlana chuan Optic Fibre hmangin District Hqrs. te Internet chak zawk pek tuma hmalak mek a nih thu leh hemi hmang hian mipuite'n information an dawn zung zung theih beisei a nih thu a sawi.

Mizoram Information Service (MIS) Officer-te tana ni 2 awh tur In-House Training hawnna hun nimin-a I&PR Conference Hall, Lianchhiari Rûn, Aizawl-a neih a hmanpuina ah Dr. Vanlalthlana chuan MIS Officer-te chu tunlai thiamna chhuak tharte ngaihvena, chhawr tangkai thei tura insiamrem thiam tur leh Sawrkar duhdan leh hmachhawpte hlenchhuah a nih theih nana ngaihtuahna seng turin a chah a. MIS Officer-te tana training changtlung zawk neih dan turte pawh buaipui mek a nih thu sawiin, hemi kawngah hian infinchhuaha thurawn pe tam turin kalkhawmte a sawm a. Hmasawn turin phurna leh zirchian peihna rilru put hmasak a pawimawh thu tarlangin, ram leh hnam tana thil tha nia an hriat te ngun taka zirchianga huaisen taka kalpui ngam turin a fuih bawk.

ICT Minister ni bawk Dr. Vanlalthlana chuan Optic Fibre hmangin District Hqrs. te Internet chak zawk pek tuma hmalak mek a nih thu leh hemi hmang hian mipuite'n information an dawn zung zung theih beisei a nih thu sawiin, Information tha mipuite'n an hriat vat hi thutlukna tha leh dik siam kawnga pui theitu pawimawh tak a nih thu a sawi a. News bakah Scheme tha tak takte leh thuthar, mipuite hriattir nghal thuai ngaite puanzar kawngah tunlai thiamna tun aia nasa zawka chhawr tangkai a tul tih sawiin, MIS Officer-te chu hemi kawngah hian ngaihtuahna senga tanlakpuiah a sawm a. Social Media kaltlanga thu belhchian dawl lo leh mipuite tichiai thei vawrhdarh a nih changa mipuite ngaihven ber chu Sawrkar thu leh hla puangtu I&PR thuchhuah a nih thu sawiin, mipui hriattur angte puanzar kawngah Media platform hrang hrangte tangkai taka hmang chhunzawm zel turin a chah a; Sawrkar thuchhuake chu rintlaka ruat a nih avangin dik leh felfai taka ziah tum turin a fuih bawk.

He Training-ah hian I&PR Secretary Betsy Zothanpari Sailo leh District hrang hranga MIS Officer-te bakah Directorate of I&PR hnuaia MIS Officer-te an tel a. Nimin-a hun hman ah hian Advertisement Rules, Mizoram Journalists' Welfare Society, Mizoram Journalists' Pension Scheme, Press Clipping, RTI, Citizen's Charter, Right to Public Services Act, Establishment Matters, Roles & Responsibilities of DDO leh Accounts matters te zirho niin Vawiin hian Public Relations, Press Release, Govt-Media Relations, Social Media & Fake News leh Mental Health at the Work place tih thupui te zirho leh a ni ang.