Kumin ah Rul chuk report 198 dawn a ni tawh

Kumin chhungin Mizoram-ah Rulchuk report 198 dawn ni tawhin Health Department chuan mipuite chu fimkhut turin an chah.

Mizoram sawrkar-a Health and Family Welfare Department in thuchhuah siama an tarlan danin Rul chuk thleng te chu Integrated Health Information Platform (IHIP) hmangin nitin report thin a ni a, IHIP Report atanga a lan danin Mizoram pumah January 2024 atang nimin thleng khan Rulchuk 198 report dawn a ni tawh a, heng rul chuk report an dawn tawh te zinga enkawl ngai leh damdawi In pan mi 142 zinga mi 135 (95%) te chu sawrkar damdawi In a enkawl an ni bawk.

Health Department chuan kum 2023-2024 atang khan National Programme for Prevention and Control of Snakebite Envenoming (NPSE) programme chu Mizoram-ah kalpui a nih thu leh he programme hnuaiaah hian kum 2024 chhung hian Health Department chuan kawng hrang hrangin hma a la chho mek tih pawh an tarlang a. Rul chuk enkawlna tha zawk mipui ten an dawn theihna atan hma lain kum 2021 - 2022 atang khan Mizoram chhunga District Hospital zawng zawnga hman tur Antisnake Venom dah tanin, kum 2022-2023 atang khan Primary Health Center leh a chung lam sawrkar Damdawi In-ah te dah a ni tih an tarlang a ni.

Health Department chuan Fur-ah hian nasa takin Rulchuk case a tam thin avangin mipuite chu Rulchuk theihna laka an inven fimkhur a pawimawh thu leh Zan-a pawn chhuahna ah reng reng Torch Light eng tha tak nen fimkhur taka kal thin tur a ni tih an tarlang a. Inbul, huan leh ram lama hnathawk thin ten kut leh ke khuh kim thei thuamhnaw, kekawr, ngalzem leh kawr bantluan, pheikhawk rawng sang leh kutkawr hmang uar tura chahin, Rulchuk laka mipuite kan him theih nan, In/Lo leh Huan Thlam bul vel fai taka enkawl thin tur a nih thu te, Rul in a ei thin Sazu te hian Rul a koh hnaih thin avangin heng hmun ah te Sazu an awm loh nan hmalak tur a nih thu leh Zan mutna ah Thosilen zar a phui tak a bilhluh thin tur a nih thu te an tarlang a ni.

Heng bakah hian Rulchuk tam ber te hi Tur nei an ni vek loh thu leh eng Rul pawhin mi a chuk in phili buai lovin zawimuanga Rul atang inthiarfihlim tur a nih thu leh damlo chu thlamuan/hnem a pawimawh thu an tarlang a. “A hmuamhma hnaih a inbel pheikhawk, ngun, zungbun, kawnghren, sana leh thuamhnaw inbel te phelh thawl tur a ni. Ngaihthah mai lova, a rang thei ang ber a damdawi In biakpawh a panpui vat tur a ni. Rulchuk na hmuamhma khawih danglam loh nise. A chukna hmun tawn khalh, zai belh a thisen sawr, Rul Tur fawhchhuah tum leh ramhmul hman loh tur a ni. A hmuamhma che tam lo tura Them dawh chungin, damlo veilam delh a mut tir chungin damdawi In pan vat a him ber a ni,” an ti bawk.