July 1, 2024 atang Criminal Law thar hmang dawn

Thla thar July 1, 2024 atang khian misual leh dan bawhchhiate hremna dan thar (Major Criminal Law) thar chu hman a ni dawn.

Hemi chungchanga sawrkar thuchhuah tarlan danin Major Criminal Law thar hman turte hi Bharatiya Nyaya Sanhita (BNS), Bharatiya Nagarik Suraksha Sanhita (BNSS) leh Bharatiya Sakshya Adhiniyam (BSA) te niin India rampumah heng Dan thar te hi hman a ni dawn a, BNS hian ‘Indian Penal Code, 1860’ a thlak ang a, BNSS hian ‘Code of Criminal Procedure, 1973’ a thlak ang a, BSA hian ‘Indian Evidence Act, 1872’ a thlak ang. BNS hian Section 358 a nei ang (IPC in Section 511 a nei). Dan bawhchhiat theihna chi 20 belh niin, lung In tan theihna hi 33-a tihpun a ni bawk. Vantlang hna thawh (community service)-a inhrem theihna tur dan bawhchhiatna chi ruk dah belh a ni a, inhrem ngei ngei ngaihna chi 23 dah belh a ni bawk. BNSS hnuaiah hian Police-in mi an kawl theih chhung hian dan bawhchhiat azirin ni 15 atangin ni 90-ah tihpun a ni a. BNSS hian Section 531 a nei bawk (CrPC ah Section 484).

Heng Criminal Law tharte hi District leh Unit hrang hranga Police ten an hriatthiam leh an bel theihna turin theihtawpin hmalak a ni a. Training Branch, PHQ chuan BPR&D, Govt. Mizoram Law College, Mizoram Forensic Science Laboratory te pawh hemi kawngah hian a thawhpui bawk a, Dan thar hman chungchanga hmalakna atan hian Mizoram Police hnuaiah Committee pawimawh panga, 1) Legal Issues, 2) Technology Upgradation, 3) Training, Digital Investigation leh 5) Financial Implication te din a ni a. Heng Committee te hian thil tul leh mamawh hrang hrang te zirchiangin, heng dan thar hi hlawhtling taka hman a nih theiha atan sawrkarah cheng vbc. 13.4 hmanna tur an thehlut tawh a ni.

Mipui nawlpui leh Police mi leh sa ngei te tan pawha inzirna turin heng Criminal Law thar atanga a pawimawh zual lawr khawmin video siam a ni a. Lehkhabu leh thuziak te pawh siam niin hmun hrang hrangah thawndarh a ni a. Case IO te hman tur form Delhi Police in an siam te, Police Organisation dangin FAQ an siam te pawh Mizoram mila siam danglam niin Unit tinah thawn darh a ni bawk.

Mizoram Police chuan Mobile Forensic Van pali (4) lei tawhin District Hqrs. Aizawl, Lunglei, Champhai leh Kolasib-ah te hian a dah tawh a. Mizoram Forensic Science Laboratory chuan tunah hian Mobile Forensic Van sawm (10) dang lei turin hma a la leh mek a, reilote a lo thleng mai tura ngaih a ni. Heng Forensic Vehicle te hi a thiamin an enkawl a ngaih avangin hetiang lama thiamna nei (trained forensic person) lirthei pakhat atan mi pali zel la thar turin sawrkarah dilna thehluh a ni a. Hemi bakah hian District Mobile Forensic Unit panga, Aizawl, Lunglei, Champhai, Kolasib leh Lawngtlai tan din turin rawtna thlen a ni tawh bawk.