International Day of Yoga vawi 10-na hman a ni

Governor Dr. Hari Babu Kambhampati chuan Yoga hmanga taksa insawizawi chu hriselna a nih bakah ram leh khawtlang hrisel zawk siam kan tumna kawngah te pawh hmalakna pawimawh a nih thu te a sawi.

International Day of Yoga vawi 10-na puala nimin-a Hawla Indoor Stadium-a hun hman ah Governor chuan India ram atanga Yoga rawn pianchhuah dan te, tunah chuan khawvel pumpuiah mi tam takin tuipui mekin nitin an taksa sawizawina an hman thin thu a sawi a. Yoga hmanga taksa insawizawi chu hriselna a nih bakah ram leh khawtlang hrisel zawk siam kan tumna kawngah te pawh hmalakna pawimawh a nih thu sawiin, Mizoram-ah pawh Yoga tuipuitute an pung zel chu lawmawm a tih thu a sawi a, Mizoram hmelhmang mawi tak leh boruak thianghlim tak chu Yoga hmanga insawizawina atan hmun duhthusam a ni tih sawiin, Yoga thatna leh tangkaina mi tam zawk ten an lo hriat pawh theih turin Directorate of Ayush a thawk te pawh tan la zel turin a fuih bawk.

He hunah hian Chief Secretary Dr. Renu Sharma pawhin NCC Cadets leh kalkhawmte hnenah tunlai khawvel, hmasawnna leh kawng engkima intlansiaknaah hian rilru leh taksa hriselna atana tha lo te kan nitin nunah kan tawng thin tih sawiin, hetiang hunah hian kan taksa leh rilru hriselna ngaihpawimawh hi ka thlahthlam tur a ni lo tih a sawi a, hriselna atan kan tih theih awlsam tak leh hautak lo, khawi hmunah pawh ka tih theih chu Yoga hmanga insawizawina hi a nih thu a sawi bawk.

Nimin-a he hun hman ah hian Common Yoga Protocol neih niin Governor Dr. Hari Babu Kambhampati, Lady Governor Dr. Jayashree Kambhampati, Chief Secretary leh Yoga tuipuite chuan Common Yoga Protocol insawizawina an nei ho a. Yoga Protocol-ah hian Ministry of AYUSH atanga Yoga Instructor hma hruaiin Yoga exercise a tel te chu Asana hrang hrang an neihpui a. He hunah hian Yoga tuipuitute bakah hian NER Directorate leh Group HQ Silchar kaihhruaina Mizo Bn 1, Mizo Air SQN 1 leh Mizo Bn NCC 20-a NCC Cadet-te bakah an Commanding Officer leh Instructor-te pawh an tel a ni.

Report a tarlan dan chuan AYUSH Directorate hnuaiah Yoga Instructor 12 an awm mek a, chungte chu District Hospital 8 (Pariat)-ah te, Civil Hospital Aizawl-ah te, Integrated AYUSH Hospital Thenzawl-ah te, Administrative Training Institute (ATI)-ah te dah an ni.

International Day of Yoga hi nimin vek khan ramchhung hmun hrang hrangah pawh hman a ni a, Lunglei-ah chuan ‘Yoga, mahni leh khawtlang tan’ tih thupui ah hmangin C. Thuamluaia Mual-ah hman a ni a, Siaha-ah pawh Siaha Helipad-ah he ni pual hian hun hman niin zirna in hrang hrangah te pawh he ni pual hian hun hman a ni bawk.