Lengpui Airport-a hnathawh mek leh Tlawng lui a Lei dawh mek MSPMC ten a hmunah an enfiah

Mizoram State Project Monitoring Committee (MSPMC) chuan Lengpui Airport tihchangtlunna hnathawh hrang hrangte chu nimnpiah khan an enfiah.

‘Improvement & Upgradation of different facilities at Lengpui Airport’ hnuaia hnathawh enfiahna ah hian MSPMC Team-te hi Vice Chairman R. Lal Rinawma IRS (Rtd) chuan hovin tunhnaia Secretary atana ruat thar Er. Lalthanzuala Ralte bakah Member dangte kalin Nodal Department PWD bakah Aviation Wing hotu ten an lo dawngsawng a. MSPMC hian Improvement & Upgradation of facilities at Lengpui Airport hnathawh kal mek hi kumin April 22 khan an lo tlawh tawh a, a hnuah member tlem zawk intirin June 6, 2024 khan an lo tlawh nawn tawh bawk a. Heta an thil hmuh leh siamthat ngai te MSPMC General Body Meeting-a an sawiho bakah rawtna engemaw zat a mawhphurtu Department-ah an lo thlen tawh bakah PWD, PHE leh P&E leh Aviation Wing te nen pawh an lo sawiho tawh bawk a, a enkawltu Department leh Contractor te nen hna tha taka a kal zel theih dan tur ruahmanna siam chhoh zel tura tih a ni bawk.

MSPMC Team-te hian rawtna hrang hrang an lo siam tawh angin hna hi kalpui a ni em tih an en lehin ruahman ang taka a puitlin ngei theih nan a tul angin vil zui zel an tum a. Contractor-te hnathawh a chak lo hle nia an hriat thu sawiin, chak zawka thawh chhunzawm a nih theih dan tur leh hna peng hrang hrangte thawhho dan tur an sawiho bawk.

Mizoram State Project Monitoring Committee (MSPMC) Team te hian niminpiah vek khan National Highway-44(A) a Tlawng lui kanna tura Steel Arch (Semi through Bridge) Lei dawh mek chu an tlawh bawk a, he Lei hi Ministry of Road Transport & Highways, Govt. of India project niin EPC Mode-a thawh a ni a, Contractor chu Poddar Infratech Pvt. Ltd, New Delhi a ni. He Lei dawh mek sei zawng hi meter 102 niin he hna atana Agreement Amount chu cheng vbc. 36.99 a ni a. A hna hi hmun nga-a then-a hmun 4 vel thawh zawh ni tawwhin hna hmabak zawng pawh hi September, 2024 chawhma lama zawhfel vek tum a ni a. He Lei hi Tlawng lui kam-ah dawh mek niin August thla ah Tlawng lui kan-a khai tum a ni.

He Lei dawh enfiahna ah hian MSPMC hi PWD-a thawktute leh Poddar Infratech Pvt. Ltd. aiawh ten lo dawngsawngin he Lei dawhna hmanraw hrang hrangte hi Testing Laboratory-a test hnua a tling chauh hman thin a nih thu helai hmuna hnathawktute chuan MSPMC te hi an lo hrilh a, hna thawh tawh chin hi MSPMC chuan tha tiin hun bituk chhunga tha taka thawk zo turin a thawktute an ngen bawk.

Comments

Popular News (Last 30 Days)

Serchhip DCSO sawn a ni