Mizo tawng-a ziak Zirlaibu pahnih tlangzarh

Mizoram Board of School Education (MB-SE) buatsaih Mizo tawng-a ziak Pawl 11 Zirlaibu 4- Physics, Chemistry, Biology leh Mathematics te chu nimin khan School Education Minister Dr. Vanlalthlana'n Directorate of School Education Conference Hall, Aizawl-ah a tlangzarh a, National Education Policy (NEP) 2020 in tawng chi hniha zirna kalpui, a bik takin Mathematics leh Science subject-ah te a ngaihpawimawh em avangin MBSE chuan tawng chi hnih (Mizo leh English version) zirlaibu 'bilingual textbooks' siam turin kum 2022 atangin hma a la tan a. Academic Session 2023-2024 ah khan Mizoram pumah Science leh Mathematics bikah pawl 9 leh pawl 10-ah te bilingual version textbooks hman tan a ni a, MBSE hnuaia zirlaite chu India rama bilingual textbooks hmang hmasa ber an ni. Tunah hian pawl 12 Science leh Mathematics subject-te Mizo tawnga buatsaih turin buaipui mek a ni bawk. 

Zirlaibute hi Mizoram chhungah print niin ISBN a awm vek a. Physics hi phek 384 a chhah niin Rs 300/- man a ni a. Biology hi phek 406 a chhah Rs 250/- man; Chemistry hi phek 517 a chhah Rs 300/- man leh Mathematics hi phek 205 a chhah Rs 250/- man a ni a. Heng leh-khabute hi MBSE textbook dealer-te hnenah ngaihven theih a ni.