Ruihhlo hmansual leh tawlhruk dona ni-ah Serchhip Police ten Heroin an halral

Ruihhlo hmansual pawi zia inzirtirna leh ruihhlo tawlhruk dona ni, International Day Against Drug Abuse & Illicit Trafficking chu nimin khan khawvel hmun hrang hrangah hman niin Serchhip-ah pawh he ni pual hian Programme hrang hrang hman a ni a, Serchhip Police ten Heroin No. 4 an man sa thahnem tak chu halral a ni bawk.

Serchhip-a Excise & Narcotics Department chuan International Day Against Drug Abuse & Illicit Trafficking pual hian nimin chawhnu khan Govt. High School Serchhip-ah ruihhlo hmansual pawi zia inzirtirna hun an hmang a, he hun hi Asst. Commissioner of END Malsawmkima chuan hmanpuiin Mizoram-ah ruihhlo a hluar zel thu leh thalai tam takin an nih tur ang an nih phak loh phah thu sawiin, hei vang hian zirlaite chu ruihhlo laka inthiarfihlim turin a chah a. Ruihhlo ngawlveina chu tih chhin atanga lo intan a nih thin thu sawiin, hei vang hian zirlaite chu ti chhin lo tura an ngaihtuahna hmang turin a chah bawk a ni. He hunah hian Sub-Inspector B. Lalengmawia chuan zirlai kalkhawmte hnenah ruihtheih thil chi hrang hrang hmansualna leh ngawlveina a lo awm chhan te sawiin, ngawlvei tawh te chhanchhuah leh chu thil harsa tak a nih avangin a la ti ngai lo te venhim chu a pawimawh thu a sawi a. Chumi atana hriat tur pawimawh hrang hrangte a sawifiah bawk a ni.

International Day Against Drug Abuse & Illicit Trafficking pual hian nimin chhun khan Serchhip District Executive Force (DEF)-a District Drug Disposal Committee chuan Serchhip Police ten ruihhlo an man sa engemaw zat an halral bawk a, hemi puala inkhawm tawi Serchhip SP Complex-a buatsaih ah Serchhip SP MS. Dawngkima chuan he ni hi ruihhlo chi hrang hrang dona kawnga nasa lehzuala hmalak a tul zia inzirtirna atan hman thin a nih thu a sawi a. Heng ruihhlo chi hrang hrangin kan ram leh thalaite a tichhe zel tur venhimna kawnga chak lehzuala hma kan lak a tul zia leh kan tan lehzual a tul zia kan hriat a pawimawh thu a sawi bawk.

He huna tarlan a nih danin nikum (2023) June 26 leh kumin June 26, 2024 inkar chhung hian Serchhip Police te hian Heroin No. 4 gram 747 manin hei hi Rs. 15,12,220/- man nia chhut a ni a, hemi chhung vek hian Methamphetamine kg. 5.32 manin Rs. 35,10,500/- man nia chhut a ni bawk a, heng kaihhnawih ah hian thubuai 11 ziahluh niin miipa 10 leh hmeichhia 7, an vaiin mi 17 man an ni bawk.

Heng bakah hian hemi hun chhung vek hian Rakzu litre 1,292 manin Rs. 6,03,425/- man niin mi 29 man an awm bawk a. Nimin-a he hun hman ah hian Serchhip Police ten Heroin an lo man tawh sa, Court in tihral tura a phal tawh gram 51.310 chu halral niin hei hi Rs. 1,53,930/- man nia chhut a ni bawk.

District Level Task Force on Ruihhlo Do : Demand & Harm Reduction Committee chuan nimin-a International Day Against Drug Abuse & Illicit Trafficking pual hian Eklavya Model Residential School (EMRS), Serchhip-ah hun an hmang bawk a, he hun hi School Principal Vanlalruata chuan kaihruaiin Serchhip SDO (Sadar) Rebecca Laldinmawii Hrahsel chuan he hun hi a hmanpui a, Serchhip District Level Task Force on Ruihhlo Do Master Trainer Laldinpuia chuan zirlaite chu ruihhlo chungchang leh ruihhlo hmansual pawi theih dan leh mihring nun a nghawng dan hrang hrang te zirtirin K.Hmingthansangi, Consultant, NTCP kaihhruaina in ruihhlo laka fihlim tura intiamkamna (pledge) sawi rual a ni bawk.

Serchhip-a awm Assam Rifles te pawhin International Day Against Drug Abuse and Illicit Trafficking pual hian Govt. Higher Secondary School Serchhip-a zirlai naupangte tan ruihhlo that loh zia inzirtirna hun an buat-saih bawk a, he hunah hian zirlai naupang mi 52 leh an zirtirtute an tel a ni.