Mizoram Drug Policy siam mek a ni tih sawi

Social Welfare Minister Lalrinpuii’n mumal taka ruihhlo do anih theih nan Mizoram Drug Policy siam mek a nih thu a sawi a, Jail tang te zinga ruihhlo ngai te enkawlna tur bakah naupang ruihhlo ngai enkawlna turah hmalak mek a nih thu a sawi bawk.

Khawvel puma ruihhlo hman sual leh tawlhruk dona ni, International Day against Drug Abuse and Illicit Trafficking puala thuchah a sawi a Social Welfare Minister chuan Department in kum 2022-a Naupang kum 10 atanga kum 17 zinga zirchianna a tihchhuah, Survey Report on Drugs and Children in Mizoram-ah mi 10,773 kawmin Middle School zirlai te zingah ruihhlo a inhnamhnawih hmuh tur an awm nual tih a sawi a, hei hian a lantir chu kum naupang te ah ruihhlo ti tan an tam hle tih a ni tih a sawi.

Minister Lalrinpuii chuan Excise and Narcotics Department in a chhinchhiah danin kum 1984 atanga kumin June ni 19 inkarah Mizoram-ah ruihhlo vanga thi mi 1851 an awm tawh tih a sawi a. Chief Minister Lalduhoma kaihhruai State Level Core Committee on Ruihhlo Do chuan ruihhlo chungchanga inzirtirna ‘Handbook on Ruihhlo Do’ a siam a, hemi hmang hian District tinah Master Trainer mi 44 ten zirlai te hnenah zirtirna an kalpui mek a. Central Sawrkar hnuaiah Mizoram hian Ruihhlo ngai enkawlna hmun 10 ah kalpui mekin Nasha Mukht Bharat Abhiyan – Drug Free India Campaign chu District tinah kalpui mek a nih thu a sawi bawk.

Minister chuan nu leh pa ten mahni fate nungchang uluk taka zirchiangin khawlaia an tal tam loh nan chhungkaw nuam leh hlim siam a pawimawh thu pawh a sawi bawk a, Kohhran chu ruihhlo chungchang inzirtirna tura hmun pawimawh tak anih angin hma la tura sawmin mi tin te thawhho puiah a sawm bawk.

Comments

Popular News (Last 30 Days)

Serchhip DCSO sawn a ni