Cooperative Society thawk thate chawimawina hlan

Cooperative Society-a thawk thate hnena hlan thin ‘National Cooperative Development Corporation (NCDC) Regional Awards for Cooperative Excellence and Merit-2023’ chu nimin khan Cooperation Minister PC. Vanlalruata chuan Cooperative Society 3 te hnenah a hlan.

He chawimawina hlanna puala inkhawm RCS Office Conference Hall, Babutlang, Aizawl-a neih ah Cooperation Minister PC. Vanlalruata chuan Cooperative Society tithate chawimawina hun buatsaih chuan Cooperative Movement tihchak kawngah rah tha a chhuah ngei a beisei thu a sawi a. Chawimawina dawngte a lawmpui thu sawiin, midang tana entawntlak nih chhunzawm zel tum turin a fuih a. Eizawnna ngelnghet siam leh ram sum leh pai dinhmun siamthat kawnga pawimawh tak Cooperative Society-te chu thahnemngai taka thawhhopuiah a sawm bawk a. Sawrkar Policy 'Bana Kaih' ah Cooperative Society-te ngaihpawimawh niin tangkai taka hman tum a nih thu a sawi bawk.

NCDC Regional Awards for Cooperative Excellence and Merit hi kum hnih (2) dana sem thin niin, North East State-a Cooperative Society hna thawk thate hnenah National Cooperative Development Corporation (NCDC) bultuma semchhuah thin a ni a. Society hnathawh dan leh an dinhmun tehna hrang hrang point 6 te hmangin State Level Selection Committee, Cooperation Department Secretary kaihhruaina hnuaiah member 4 ten uluk takin an thlang thin a ni. He Award-in a tum ber chu ram hmasawnna kawnga Cooperative Society-te pawimawhna leh tangkaina hriatpuite, Cooperative-te'n a bulthut atanga ram hmasawnna kawnga tha an thawh theihna tura inelna thianghlim buatsaih leh NCDC in Cooperative Sector-a tha a thawh dan tarlante a ni.

Kumin hian Mizoram-a Society pathum hnenah chawimawina hi hlan niin Best PACS Category-ah Excellence Award chu Champhai Large Size Agriculture Multipurpose Cooperative Society Ltd. (Champhai LAMPS) chuan dawngin Citation leh Rs. 25,000/- hlan an ni a, Merit Award pawh Vaphai Primary Agriculture Credit Cooperative Society Ltd. (Vaphai PACS) hnenah hlan niin Citation leh Rs. 20,000/- an dawng bawk a ni. Best Societies in 2 Prominent Sector hnuaia Consumer Sector-ah Kawnpui Consumer Cooperative Society Ltd. in chawimawina dawngin Citation leh Rs. 25,000/- hlan an ni bawk.

He hun hmanpuitu Sang Kandu Mosobi, Chairman, AP MARKFED & Member of General Council, NCDC chuan NCDC Sub-Office Aizawl chu March 2024 atanga kalpui tan a nih thu leh North East State-ah te din vek tum a nih thu a sawi a, hemi kaltlang hian District leh khaw hrang hrangah te chak zawka NCDC Scheme-te hrilhhriat theih beisei a ni tih sawiin, NCDC Aizawl Sub-Office chu theihtawp chhuah turin a chah bawk.

Comments

Popular News (Last 30 Days)

Serchhip DCSO sawn a ni