Kumin ah ruahtui dawng tam dawn niin hria

Indian Metereological Department (IMD) Aizawl Center chuan kumin hian Mizoram in ruahtui a dawng tam dawn nia hriat a nih thu an sawi.

 IMD Aizawl Centre Director, Sudheer Kumar Dwivedi-a chuan kumin chhung hriat theih chinah nikum nena khaihkhinin ruahtui mm 100 velin a tla tam tawh zawk a, kumin January thla atanga June thla thleng khan Mizoram pumah ruahtui milimeter 620 dawn a tla tawh a, a hun chhung inang-ah nikum khan ruahtui milimeter 600 vel a tla thung a ni.

District mala chhut chuan Kolasib chu ruahtui tla pun nasat berna hmun niin, January atanga June thleng khan milimeter 1,111 vel a tla tawh a, nikum khan a hun chhung inang ah ruahtui milimeter 684.30 a tla thung. Champhai District chu ruahtui tlak tlem berna hmun a ni a, kuminah milimeter 185 chauh a la tlak laiin nikum khan milimeter 440 a tla a ni.

Khawvel sik leh sa inthlak danglam nasa leh boruak lum chho zelah Mizoram pawhin kawng hrang hrangin a tuar chho ve a; Global Warming-in a nghawng langsar zingah ruahsur dan hi a tel a, hmun hrang hranga ruahtui tlak dan a danglam nasa hle a, hei mai bakah hian ruahtui tla zat pawh a danglam hle bawk a ni.