The Mizoram (Village Councils) Bill 2024 chungchangah inrawnkhawmna neih a ni

Mizoram-a Village Council (VC) kalphung siamthatna tura rawtna, ‘The Mizoram (Village Councils) Bill 2024’ chungchangah inrawnkhawmna leh sawihona chu nimin khan neih a ni a. Village Council pakhat-a VC Member tam zawng chu mipui cheng zat a zira bithliah tura rawt a ni.

He sawihona Mizoram New Capital Complex (MINECO) Secretariat Conference Hall-a neih hi LAD Minister C. Lalsawivunga chuan kaihruaiin VC Bill 2024 chungchanga ngaihdan leh rawtna siam tura kalkhawm zawng zawngte chungah lawmthu a sawi a. Kan VC te tha tichak a khawtlang inrelbawlna changtlung zawk kan neih theih nana an ngaihdan sawi turin a sawm a ni.

He Meeting-ah hian VC te chu The Lushai Hills District (Village Councils) Act 1953 hnuaia inenkawl an la nih thu leh he Dan hi a hlui tawh avang leh kan khawtlang in kan mamawh tawh lem loh a tam bakah thil thar belh tur leh tihdanglam tur a awm tawh avanga he VC Draft Bill 2024 hi lo irhchhuak a nih thu tarlan a ni a. VC Member a Hmeichhe reservation leh VC Term rei zawng chungchang sawiho a ni bawk a. He Draft bill, The Mizoram (Village Councils) Bill 2024 chungchang inrawnkhawmna-ah hian VC member-te tam zawng chu Household based ni lovin Population based a kalpui ni tawh se tih a ni a. VC Secretary atan Sawrkar hnathawk angin Special Recruitment awm thei se tih a ni bawk a. Meeting-ah hian VC thiah hun, thiah dan leh an hnathawh tur bakah an thuneih dan tur te sawiho nghal a ni bawk.

He dan hi Assembly-in a pass hunah Municipalities, Lai, Mara, leh Chakma Autonomous District Council huam lovin Mizoram pumah hman tur a ni anga. Nimin-a thutkhawmah hian Member te'n ngaihdan leh duhdan an neih te sawi vek sen a nih loh avangin LAD Secretary hnenah an ngaihdante ziaka thlen a, Drafting Committee-in a khaikhawm atan tih a ni a. Chumi atanga thla khat hnuah thutkhawm leh nise tih a ni bawk.

Nimin-a thutkhawmah hian Mizoram-a Political Party aiawh hrang hrang BJP, Congress leh MNF aiawh bakah MUP, Central YMA, All Mizoram VC Association, khawtlang inrelbawlna lama mithiam Pensioners aiawhte, Drafting Committee Member, LAD Secretary bakah LAD-a Officials te an tel a ni.