Industry ten chak zawka hma an sawn theih nan RAMP leh Facilitation Cell te CM in a hawng

Hri leng avanga harsatna tawk Industry ten chak zawka hma an sawn theihna tura sawrkar laipui duan, Raising and Accelerating MSME Performance (RAMP) leh Facilitation Cell hawnna chu nimin khan Chief Minister Lalduhoma hovin Aizawl Vanapa Hall-ah neih a ni.

RAMP Kick-off leh Facilitation Cell hawnna hunah hian Chief Minister chuan COVID-19 hripui vang khan Industry ten harsatna an tawk nasa a, heng kan Industry te hian chak zawka hma an lo sawn leh theih nan Central sawrkar chuan RAMP hi a rawn duang tih sawiin, “State te chu keimahni mamawh ang zawnga Guidelines duan min rawn phalsak a. Kan mamawh ang tak leh kan policy milin a kalpui dan tur kan duang a, a hming pawh hi MSME Elevate Mizoram (MEMiz) tiin kan vuah ta a ni,” a ti a. Kan Industry neihsa leh ding chho zel tur ten tangkai taka an chhawr turin Facilitation Cell din a nih thu a sawi bawk.

Chief Minister chuan India ram economy za zela 30 vel hi Small Scale Industry te thawhchhuah a nih thu leh hnathawktu zaa 46 vel te hi Small Scale a thawk te an nih thu sawiin, “Chuvang chuan keini pawhin kan Hand Holding Policy leh heng Central Schemes te hi kaikawpin nasa takin hma kan la dawn a ni,” a ti a. “Kan sawrkar veleh khan Mizoram Investment Policy, 2024 kan siam nghal a, kan tangkaipui tur investor te kan dap zui a. Mizoram State Industrial Policy, 2012 pawh ennawn mek a ni. He Policy hnuaiah hian State Incentive Subsidy Scheme a awm a, mahse pawisa hi hun rei tak dah a lo ni ngai tawh lo thung a. Kan sawrkar veleh khan SIS-ah hian cheng nuai 42.31 chu Revised Estimate angin kan dah nghal a. Kumin sawrkar kumah pawh cheng nuai 42.31 tho hi kan dah leh a ni,” a ti a. “Sawrkar hian kan ram dehchhuah thilte chawilar kan duh avangin The Mizoram Preferential Store Purchase Rule pawh tha taka kalpui kan tum a. Chu chu kan industry ten an lo hlawkpui kan beisei. Sawrkar office te chu an bungrua thlak a tul hunah Mizoram thilsiam zela thlak tawh turin kan ti a ni,” a ti bawk.

Industry chu economy innghahna pawimawh a nih avangin miin theihna a neih phawt chuan hmalakna kalpui se; kan mihausa te pawh in thianho leh pawl (company) ang te in Industrial Unit te, Service Sector Unit te rawn din chur chur se an duh thu Chief Minister chuan sawiin, theihtawp an chhuahpui tur thu a sawi a. “Amaherawh chu sawrkar tanpuina chauh beisei, hlawhtlin tum tak tak lo, a thlawna pawisa dawnna tur emaw ti te tan erawh chuan ‘Bui lung tawk’ ang hlauh kan ni dawn,” tiin “A thlawna sem, a thlawn a dawn, kan moral eichhetu hi kan malmak hmiah dawn a ni,” a ti bawk.

He hun hi Commerce & Industry Drector Florence Zotluangpuii chuan kaihruaiin Lalhmunsiama, Nodal Officer for RAMP chuan RAMP leh Facilitation Cell kalpui dan tur leh India ramin Industry a enkawl dan tlangpui te a sawi. Tunah hian MSME sumdawnna unit 34900 vel Mizoram-ah an awm mek a, a zatve aia tam te hian Udyam Registration an la nei lo a ni.

Comments

Popular News (Last 30 Days)

Serchhip DCSO sawn a ni