Eiruk thubuai-ah Court in mi pahnih thiamloh chantir

Aizawl District Court-a Special Judge (Prevention of Corruption Act) Dr. HTC. Lalrinchhana chuan State Bank of India (SBI), Mission Veng Branch-a Manager ni thin Lalkhomang Guite leh a thurualpui Sacred Heart Society neitu Gary T. Haokip te chu eiruk thubuaiah thiamloh a chantir a, karleh Thawhtanni-ah hremna puan a ni ang.

He thubuai hi November 2005 leh October 2007 chhunga khatih laia SBI, Aizawl Mission Veng Branch-a Manager ni thin Lalkhomang Guite leh a thurualpui Sacred Heart Society neitu Gary T. Haokip te, Mizoram Rural Development Society Aizawl Chairman K. Lalremtluanga te, Sacred Heart Society-a thawk Rosangkimi Ralte leh Upliftment of Backward Women Self Help Group Chairman Thantluang te Self Help Group hrang hrang hminga loan pekchhuah leh chuta tanga sum lo eirua puhna a ni.

CBI-in he thubuai a chhuinain a tarlan dan chuan Lalkhomang Guite leh a thurualpui Gary T. Haokip leh Rosangkimi Ralte te chuan Self Help Group (SHG) lem pahnih Nightingale Self Help Group leh Ramdin Self Help Group phuahchawp hminga Loan cheng nuai 5 ve ve la chhuakin sum hi an tichingpen zui a. Hei bakah hian Lalkhomang Guite leh a thurualpui Gary T. Haokip te hian SHG 11- Gilgal Self Help Group, Ropuiliani Self Help Group, Bazar Self Help Group-I, Beiseina Self Help Group, Zanpar Self Help Group, Nazareth Self Help Group, Kumtluang Self Help Group, Hawilopar Self Help Group, Ainawn Self Help Group, Bhakta Self Help Group leh Ideal Mother Self Help Group te hmingin loan cheng nuai 5 theuh pechhuakin, heng SHG hian Rs. 50,000 chauh te, Rs. 10,000 chauh te dawngin, a bak zawng chu ti chingpenin KVIC hnuaia Margin Money te pawh an tihchingpensak a ni.

Lalkhomang Guite, Gary T. Haokip leh Thantluangi te hian ‘Up-liftment of Backward Women Self Help Group’ hmingin loan hi cheng nuai nga pechhuakin, heta tang hian cheng nuai khat chauh hi SHG hian an dawng a, a bak cheng nuai li zet hi tichingpen a chhuichhuah a ni bawk a. Lalkhomang Guite leh a thurualpui Gary T. Haokip leh K. Lalremtluanga te hian SHG pathum- Greenhill Self Help Group, Zoawi Self Help Group leh Mualmam Self Help Group te hming hian loan cheng nuai nga theuh pechhuakin, he SHG-te hian cheng nuai hnih theuh chauh an dawng tih chhuichhuah a ni bawk.

He eirukna thubuaia inhnamhnawih a puh Rosangkimi Ralte hi thubuai chhui lai hian a thih avangin chhui zui a ni lova, inhnamhnawiha puh Thangtluangi leh K. Lalremtluanga te thiamlohna hi CBI in an hmu lo a, Lalkhomang Guite leh Gary T. Haokip te hi Court chuan puh an nihna ah finfiahna hmuin Court chuan thiamloh a chantir a, karleh Thawhtanni khian hremna hi puan a ni ang.