DC in Aadhaar update ngai pawimawh turin chah

Serchhip District Bawrhsap chuan Serchhip District chhunga khua leh tui te chu Aadhaar enrollment ngai pawimawh tur leh a hun taka Aadhaar update thin turin a chah.
Aadhaar chungchanga hriattirna a tihchhuah ah Serchhip Bawrhsap chuan Aadhaar chu Sawrkar laipui leh State Sawrkar chuan a dah pawimawhin, Sawrkar thil tihna reng rengah Aadhaar Number hman a ngai deuh zel tawh tih a tarlang a, hei vang hian Serchhip District chhunga khua leh tui te chu Aadhaar enrollment ngai pawimawh tur leh a hun taka update thin turin a hriattir a ni.

District Bawrhsap thuchhuah chuan kum 10 aia upa chuan Aadhaar revalidation tih tur a nih thu leh Proof of Identity (PoI), Mahni nihna fiahna leh Proof of Address (PoA), Mahni chenna fiahna upload tur a nih thu tarlangin, my Aadhaar portal-ah Rs. 25/- chawiin documents (PoI leh PoA) te upload-in mahni in-update/revalidate theih a ni tih a tarlang a, Aadhaar Enrollment Centre-ah chuan Rs. 50/- chawi tur a nih thu a tarlang bawk.

Hei bakah hian naupang kum 5 an tlin hunah leh kum 15 an tlin hunah Mandatory Biometric Update tih tur a ni tih pawh tarlangin, kum 5 atanga kum 7 leh kum 15 atanga kum 17 inkar te tan man chawi a ngai lo tih a tarlang a, Zirlai zirna sang zawk/phai lama lehkha zir chhunzawm tum te tan phei chuan hei hi ngaihpawimawh tur a nih thu leh Mobile phone number kan thlak chuan Aadhaar update zel tur a ni tih a tarlang bawk.

Comments

Popular News (Last 30 Days)

Serchhip DCSO sawn a ni