Lok Sabha 18-na thutkhawm hmasa ber nei tan

Lok Sabha 18-na thutkhawm hmasa ber chu nimin khan neih tan niin Member thar te lakluhna hun hman a ni a, Protem Speaker atan Bhartruhari Mahtab chu nimin vek khan lakluh a ni bawk.

Lok Sabha 18-na thutkhawm nimin-a neih a nih hma zingkar-ah President Draupadi Murmu-i chuan Speaker lailawk, Protem Speaker atan Bhartruhari Mahtab chu Rashtrapati Bhawan-ah a lalut a, hemi hnu hian thutkhawm hi neih niin Protem Speaker Bhartruhari Mahtab chuan inkhawm a kaihruai a ni. He thutkhawm ah hian MP thlan tharte chu House Member atan lakluh niin a hmasa ber ah Lok Sabha Leader, Prime Minister Narendra Modi chu lakluh a ni a, hemi zawh hian Speaker thlan hmaa tun Session kal laia Speaker lailawk puibawmtu tur Chairperson-te lakluh zui an ni. Chung te chu BJP MP – Radha Mohan Singh leh Faggan Singh Kulaste-te niin hemi hnu hian Union Minister - Amit Shah, Rajnath Singh, Shivraj Singh Chouhan, Nitin Gadkari, Manohar Lal, Piyush Goyal, Jitanram Manjhi, Rajiv Ranjan, Lallan Singh, Dr Virendra Kumar, Kiren Rijiju, Chirag Paswan leh midangte Lok Sabha member atan lakluh zui an ni bawk.

Lok Sabha 18-na thutkhawm nimin-a neih tan hi chhunzawm zel tur niin naktuk-ah Speaker thlanna neih a ni dawn a, Ningani-ah Rajya Sabha thutkhawm nei tan bawkin hemi ni hian Parliament In hnih thukhawm hmaah President-in thu a sawi anga, thla thar July 3 thleng khian thutkhawm hi neih a ni ang.