Chhingchhip-a Fruit Juice Concentrate Plant-ah Sapthei sawr bul tan a ni leh ta

Chhingchhip-a Fruit Juice Concentrate Plant-ah nimin atang khan Sapthei sawr bul tan a ni leh ta a, a bul tan lehna atan Chawngtlai khua atangin Sapthei lak niin Baibing leh Rawtuai Tin te pawh siam theih a nih thu MIFCO Chairman chuan a sawi bawk.

Mizoram Food & Allied Induatries Corporation Limited (MIFCO) hnuaia Chhingchhip khuaa Fruit Juice Concentrate Plant hi January 26, 1993 khan din ni tawhin thei chi hrang hrang sawngbawlna turin khawl leh mamawh tam tak lei ni tawh mahse hman loha dah tawl tam tak a awm a, nimin khan MIFCO Chairman Lalthazuala Rawite chuan Chhingchhip-a Fruit Juice Concentrate Plant hi tlawhin ZPM sawrkar hnuah a vawi khat nan Sapthei sawr bul tan a nih thu leh hmanrua leh mamawh chi hrang hrangte he hmun tuaitharna turin sum awm se la chuan lian zawka hmalakna kalpui theih a nih thu a sawi a ni. MIFCO Chairman chuan heng khawl dah tawl tawh te hi tangkai taka hman theih a nih thu sawiin, “Sum chu awm se heng khawl zawng zawng hi tangkai taka hman theih tur an ni a, MIFCO tangkaina leh Mizoram hmasawnna tura a thawhhlawk zia pawh kan hmu thuai ngei ang,” a ti a. Tun dinhmunah erawh bul tan thar leh chauh an nih avangin hmabak a tam thu MIFCO Chairman chuan sawiin, “Tuna Sapthei tui kan sawr mek hi enchhin nan Chawngtlai khua atangin kg khat (1) Rs. 30 in kan lei a, Sapthei bakah Lakhuihthei pawh sawr kan tum, he hmun ah hian sawr theih chi thei chi hrang hrang pawh sawngbawl theih beisei a ni,” a ti.


MIFCO Chairman Lalthazuala Rawite chuan Chhingchhip-a Mizoram Food Park hmuna Thei chi hrang hrang sawngbawl bakah hian Baibing leh Rawtuai te pawh a Tin-a siam theih a ni bawk tih sawiin, hma an la zel dawn tih a sawi a, “Ei leh bar-a kan intodelhna tur leh kan ram dinchhuahna tur chuan kan thlai chi hrang hrang te awmze neia kan sawngbawl a ngai a, kum tam tak MIFCO hi kalpui ni tawhin, la hlawhtling hlei thei rih lo mahse ZPM Policy a nih avangin keini chuan hlawhtlinpui kan tum tlat dawn a ni,” a ti.

Chhingchhip khaw daia Mizoram Food Park-ah hian tun dinhmunah hnathawk 6 an awm mek a, MIFCO hnuaiah hian hnathawktu tun dinhmunah 24 an awm mek a ni.

Comments

Popular News (Last 30 Days)

Serchhip DCSO sawn a ni