Mizoram-ah MLA Fund cheng nuai 50-a tihpun a ni

Mizoram-a MLA-te’n an bial chhunga hmasawnna hna an thawhna tur MLA Local Area Development Fund chu kumin atang hian MLA pakhat zelin cheng nuai 200 an hmang thei tawh dawn.

Planning and Programme Implementation Department-in hriattirna a tihchhuah ah MLA tinin an bial hmasawnna atana kumtina sum an hman theih, MLA Fund cheng nuai 150 ni thin chu cheng nuai 50-a tipungin cheng nuai 200 a ni tawh dawn tih an tarlang a. A punna hi za zela 33 chuang a ni. MLA Fund tihpun a nih avang hian Mizoram sawrkar chuan kumtin cheng vbc. 20 a sen belh dawn a. Kum hmasa lama cheng vbc. 60 sen thin chu cheng vbc. 80-in a pung dawn a ni. Kumin February ni 27-a kum 2024-25 budget a pharh paha a thusawi-ah khan Chief Minister Lalduhoma chuan hemi chungchang hi a sawi lang lo na chungin Budget (Annual Financial Statement)-ah erawh tarlan a ni a. MLA Fund tihpun tur chungchang hi kumin January ni 8-a Legislative Party tin aiawh telna General Purpose Committee (GPC)-in thutlukna an lo siam tawh zulzui a kalpui a ni a. Finance Department-in an pawm hnuah Planning Department hian hriattirna a chhuah ta a ni.