Cyclone Remal avanga chhiatna thleng endik tur Inter-Ministerial Central Team-in Mizoram an thleng

Cyclone Remal avanga Mizoram hmun hrang hranga chhiatna thleng rawn endiktu tur, Inter-Ministerial Central Team te chuan nimin khan Mizoram rawn thlengin hmun hrang hrang an tlawh bakah sawrkar mi pawimawh te an kawm nghal.

Cyclone Remal avanga Mizoram hmun hrang hranga chhiatna thleng endik tura Sawrkar laipuiin a ruat, 'Inter-Ministerial Central Team' te hian nimin khan Lengpui rawn thlengin Aizawl an pan pahin Sairang, Sairang Dinthar leh Sihhmui a tuilian vang a chhiatna hrang hrang an endik a. Central Team-ah hian Adelbert Susngi, Regional Officer, MoRTH; Rajeev Singh, SE, Ministry of Jal Shakti leh Moti Ram, Assistant Commissioner, Rural Development-te an tel a. Mizoram-a sawrkar mi pawimawh ten Central Team-te hi an tawiawm a, Sihhmui Village Council hruaituten chhiatna thlenna hmun te an enpui bawk.

Chhinchhiah danin May ni 28, 2024-a Remal thlipui avang khan Sairang-ah chenna In 28 tuiin a chim pil a, In dinglai 10 tuilian hian a khawih chhe bawk a,.heng zingah hian Zirna In, Mosque leh Mandir a tel a ni. Sihhmui-ah hian tuilian hian Lawngleng 12 a la bo a, Balu lakna kawng te tichhiain Tlawng kam a Nul thahnem tak a tichhe bawk a. Sairang Dinthar Veng-ah chenna In 12 leh Zirna In pakhat tuilian vang hian a chhe bawk a ni.

Inter-Ministerial Central Team te hi nimin tlai khan PHE Minister Prof. Lalnilawma chuan a Pisa-ah a kawm a, Minister chuan Central Team te chu Mizoram-ah lo lawmin Cyclone Remal avanga Mizoram hmun hrang hranga chhiatna thleng chungchang te a lo hrilhfiah a. A bikin a Department chan - PHE, Horticulture leh Rural Development Department kaihhnawih a harsatna thleng chungchang te a sawipui a. Greater Aizawl Water Supply Phase-I a chhiat vek thu leh a khawl te repair tura thawnchhuah a nih thu sawiin, Tui thianghlim mamawh ang pump chhoh a theih loh avanga mipuiin harsatna an tawh te a sawi a. Central Team chu an thil hmuh te behchhan anga Mizoram mamawh te Central Sawrkar hnena a thehluh te pawh a theih anga chaka lo enzui sak an mamawh thu te a sawi bawk a ni.

Inter-Ministerial Central Team-a Member dang gte hi Vawiin hian Aizawl rawn thleng leh tura beisei an ni a, Mizoram-ah June ni 25, 2024 thleng an cham ang a, an cham chhung hian Greater Aizawl Water Supply Scheme Phase-I & II; Melthum/Hlimen leimin te, Kulikawn leh ITI Veng Thlanmual te, ZMC Falkawn leimin hlauhawm lai te, Aizawl - Aibawk - Darlung inkar kawng te, Durtlang leh Kanan Veng Thlanmual te leh Serchhip Mat Phai, Zawlpui Zau te an tlawh dawn bawk a ni.

Comments

Popular News (Last 30 Days)

Serchhip DCSO sawn a ni