Aizawl-ah thla 5 chhungin lirthei chesual ah 13 thi

Thla nga kalta, January atanga May 2024 chhung khan Aizawl khawpuiah lirthei chetsualna avangin mi 13 an thi a, lirthei chetsualna thlen chhan ber hi a khalhtu fimkhur loh vang a ni.

Zawhna chhangin Aizawl City Traffic Police chuan thla nga kalta chhung khan Aizawl khawpui huamchhung ah lirthei chetsualna tum 15 thlengin mi 13-in nunna an chân a, hliam tuar mi pariat an awm bawk a. Traffic Police thawktute chuan January - May, 2024 chhung khan lirthei dan bawhchhia 3,965 man an nih thu sawiin, heng zinga a tam ber hi lirthei ke pahnih nei, Two Wheeler an ni a. Traffic Police-ten Two Wheeler dan bawhchhia an man zat hi 2,656 niin hei hi lirthei man zawng zawng atanga chhutin 67% a tling a ni. LMV chu dan bawh-chhia tam ber dawttu niin 956 man a ni a, HMV 167, Taxi 139, Bus 33, MMV 13 leh a dang pakhat man an awm bawk.

Lirthei dan bawhchhia man zingah hian MV Rules bawhchhia an tam ber a, a hmun lova lirthei dah (No Parking) leh Wrong side te chu a tam zual an ni a. Lirthei dan bawhchhia te sum chawi tlingkhawm hi Rs. 27,38,402 a tling bawk a. Dan bawhchhia te sum chawi tlingkhawm hi February thla khan tam berin Rs. 6,04,400/- zet a tling bawk a ni.

Comments

Popular News (Last 30 Days)

Serchhip DCSO sawn a ni