Hnam Sipai ten Mizoram an hmangaih avangin an Martar tak tak a, zah leh chawimawi an phu - Chief Minister

Chief Minister Lalduhoma chuan Remna Ni vawi 38-na puala MZP ten nimin-a hun an hman chu a hmanpui a, rambuai laia Hnam sipai nunna chan te kha ram tan an thi lem lem lo tih sawiin, “Mizoram an hmangaih avangin an Martar tak tak a, zah leh chawimawi an phu em em a ni,” a ti.

Naktuk June 30, 2024-aa Remna Ni vawi 38-na lo thleng tur puala MZP General Hqrs. in nimin-a LPS Arena, Falkland-a hun an hman ah hian Chief Minister Lalduhoma chuan remna a awm theih nana theihtawp chhuahtu All Party Leaders te, Student Joint Action Committee te, Kohhran hruaitute, hun harsa tak kara Law & Order kengkawh hram hramtu Chief Secretary Lalkhama IAS te an fakawm em em tih sawiin, nimin-a MZP ten an chawimawi kum 1981-a MLA atanga bang JH. Rothuama, P. Lalupa, Lalthanzauva leh Ngurchhina te chu remna a awm theih nana MLA bang hmasaber te an nih thu leh an phu tawk chawimawina an dawng lo fo nia a hriat thin thu leh chawimawi an phu thu a sawi a. “Zirlai pawl, Vawiin-a Remna Ni ropui taka lawmtute hian remna kha in au chhuah, in thawhchhuah a ni tih lo hrereng ang che u,” tiin remna a awm theih nana thil thleng pawimawh zualte a tarlang bawk.

Remna a awm theih nana khatihlaia India Prime Minister Indira Gandhi ngenna leh MNF President Laldenga pawmpui ngeia IPS hna a bansan tak thu te pawh Lalduhoma chuan sawiin, “IPS ka bansan hnu lawkah Pu Laldenga hmuin London ka zin a, ni 5 lai ka cham a, India sawrkara a thilphutte kan endun thin a, kan sawiin kan duang bawk a. Chuvang chuan "Kan" tih tawngkam te pawh ka hmang ve mai thin,” a ti a. “Rambuai laia hnam sipai, nunna chan te kha ram tan an thi lem lem lova, Mizoram an hmangaih avangin an Martar tak tak a, zah leh chawimawi an phu em em a ni,” a ti bawk.

Tunhnaia India ram chhung leh ram thenawma Zofate awmna apianga buaina leh harsatna rawn thleng chu Zofate inpumkhatna tura Pathian remruat, nakin lawka Zofa ten malsawmna kan dawnna tur a nih a rin thu pawh Chief Minister chuan sawiin, “Chuvang chuan inpumkhat ang u, thinlunga pakhat-ah insiam ang u,” tiin Zofa zawng zawngte a sawm a. Amah dawr thintu thenawm State leh ram te-a Zofate pawh pawl hran hranin thu hran rawn keng lova; pumkhat ni chunga thu khat rawn keng thin turin a chah bawk a ni.

MZP in Remna Ni an hmanna ah hian MZP General Secretary Chinkhanmanga Thomte chuan kumin-a Remna Ni champha June ni 30 chu Pathianni anih avangin nimin khan a lawmna an buatsaih thu a sawi a. Kum 2018 atang khan MZP te hian Remna Ni lawmna hi an buatsaih thin thu leh sawrkar pawhin a hrana lawm lovin an telpui mai thin tih a sawi bawk.

MZP te hian remna a awm theih nana mi pawimawhte hnenah chawimawina an hlan thin a, kumin hian JH. Rothuama, P. Lalupa, Lalthanzauva leh Ngurchhina te hnenah chawimawina hi an hlan a. Anni pali te hian Remna a awm theih nan kum 1981 khan MLA an nihna an bansan a. JH. Rothuama leh P. Lalupa te hi la damin, anmahni ngeiin chawimawina hi an dawng a. Lalthanzauva leh Ngurchhina te erawh an boral tawh avangin an aiawhin an tu leh faten an dawng thung a ni.

Nimin-a MZP in Remna Ni puala hun an hman hi MZP Vice President C. Lalremruata chuan kaihruaiin MZP President H. Laltianghlima pawhin pawl zawng zawng leh mi zawng huap Remna Ni lawmna an buatsaih thin thu a sawi a. “Tu ta bik mah ni lovin kan zavaia tan a ni tih pawmin, i tel tlang dial dial ang u,” tiin sawrkar pawhin Remna Ni hman chu a remtih sak tih a sawi bawk.