Raltlan thawnlet pawi ti

MNF Party chuan Bangladesh-a Zohnah-thlak ten buaina nasa tak an tawh vanga Mizoram a raltlana rawn lut nunau 200 chuang Mizoram an rawn luh tawh hnua BSF-in an thawhlet leh chu pawi an tih thu nimin khan thuchhuah siamin a tarlang a. “Heng nunaute hi Bangladesh-a an khuaa let leh ngam tawh lovin ramhnuaiah khaw-chhe karah an tangkhang mek a. An zingah naupang leh kum upa thahnem tak an tel a, a pawi kan ti hle a ni,” an ti. MNF thuchhuah chuan hetianga kan unauten harsatna nasa tak an tawh laia Mizoram sawrkar a ngawi tlat chu pawi an tih thu pawh an thuchhuah ah hian tarlangin, “An nunna atana sahimna zawnga rawn luh tum kan unaute hi ngaihtuah hram turin sawrkar kan ngen a. Zohnahthlak ram hrang hranga thendarha awmte tan Inpui kan nih chhunzawm theih nan sawrkar hian ngaihtuahna hmang se kan duh hle,” an ti. MNF sawrkar lai khan Bangladesh Zohnahthak harsatna tawkte hi Mizoram-ah thahnem tak an rawn raltlan thu pawh MNF chuan sawiin, chhawmdawlna pawh thahnem tak pek an ni tih an sawi a. Tun sawrkarah sawrkar a ngawi tlat chu hriattiam har an tih thu an sawi a ni.