Kuhva chingtu ten Home Minister-ah an thilphut an thlen

Mizoram khaw pathum-a Kuhva chingtute chuan niminpiah khan Home Minister K. Sapdanga hmuin tunhnaia Joint Meeting an neiha an thurel te an thlen.

Hachhek Bial Kuhva Chingtu Pawl leh Vairengte leh Bilkhawthlir Kuhva Chingtu Co-operative Society-te chuan tun thla ni 6 khan Vairengte-ah Joint Meeting neiin heta an thurel te hi Home Minister hnenah hian an thlen a, he Joint Meeting hian June 30, 2024 ralhma ngeia Vairengte leh a chhehvela ramdang atanga dan loa kuhva lakluh dahkhawmna Kudam-te thianfai turin Sawrkar ngenin, an ngenna in awmzia a neih loh chuan atul anga hnatlang koha hmalak an tum thu an pass a. Home Minister chuan hmalak a tum thu leh hemi chungchang hi DC te pawh sawipui a tum thu a lo hrilh a ni.

Mizoram Kuhva tharte Certificate of origin pekchhuah dan tur sawrkarin a siam thar chu Joint Meeting hian kuhva chingtute tan thil harsa leh Foreign Kuhva Smuggling dona atana him tawklo leh hman chhunzawm tlaka an ngaih loh thu an thlen bakah Dan loa Kuhva ro tawlh chungchanga Social Activist Vanramchhuangi'n Gauhati High Court, Aizawl Bench a PIL a thehluh chu CBI chhuitir turin an ngen bawk a ni.