ITI Aizawl Diamond Jubilee lawmna neih a ni

Industrial Training Institute (ITI) Aizawl in kum 60 a tlinna, Diamond Jubilee lawmna chu nimin khan neih niin Labour Employment, Skill Development & Entrepreneurship Department Minister Lalnghinglova Hmar chuan khuallian niin a hmanpui.

ITI Aizawl Diamond Jubilee lawm theia an awm chu a lawmpui thu LESDE Minister chuan sawiin, sawrkar kumah kum 60 chu pension a, hahchawlhna hun atana hman tawh tur a nih laiin ITI erawh Diamond Jubilee an thleng chu hmasawn zelna atana chona ni zawk tura a duh thu a sawi a. Kum 60 chhungin kan ram tan chhungkaw engzat nge eizawnna an siamsak tih leh engtin nge ram hmasawnna atana an thawh ve tih ngaihtuah ran-a hmasawn zel turin a chah a. ITI chu hna zirna hmun a nih angin zirlaite leh zirtirtute chu an zirchhuah a, Certificate an neih veleh a chhawrtlak an nih nghal ngei theih nan tumruhna leh taimakna nen an mawhphurna hlen turin a fuih bawk.

He hunah hian ITI Principal Vanlalhruaia chuan Report pein ITI hi kum 1964-ah din tan niin tunah hian thawktu Principal 1, Vice Principal 1, Supervisor (i.c) 1, Instructional Staff 28, Non-Teching Staff 13 awmin Engineering Trade 14, Non-Engineering Trade 5, a vaiin Trade 19-ah Total Units (thiamna chi hrang hrang zir theih) 23 a awm mek a. Training lai mipa 334 leh hmeichhia 86, an vaiin mi 420 an awm mek a. ITI Industry Partner hi Hyundai, Tata a ni. 

ITI din a nih kum 1964 atanga kumin 2024 inkara Govt. ITI a in enroll zawng zawng zat hi 5825 niin 4767 (82%) te'n tha takin an zirchhuak a. ITI a zirna hi Craftman Training Scheme (CTS) tih niin ITI hnuaia zirchhuakte hi National Council for Vocational Training (NCVT)-in National Trade Certificate a pe thin a. Hei hi Cetral/State/UT- te recognized certificate a ni.