Integrated Command & Control Centre (ICCC) hnathawh dan Home Minister in a en

Home Minister leh UD&PA Department changtu Minister K. Sapdanga chuan nimin khan Aizawl-a Old Secretariat Building-a Integrated Command & Control Centre (ICCC) tlawhin an hnathawh dan te a enpui.

Aizawl Smart City Ltd. hnuaia din, IT hmanga Aizawl khawpui hmun hrang hrang viltu nia ngaih theih, Integrated Command & Control Centre (ICCC) hi a tangkai hle nia a hriat thu Home Minister chuan sawiin, tunhnaia misual hnu chhuina kawngah te leh lirthei intihpalhna leh lirthei in mihring a sut a tlansan te chu ICCC a camera atangin hriatchhuah a ni a, Chhiatrupna a thlen palh thu hlaah Information inpek zung zung theihna atana ICCC hi tangkai lehzua a hman a tul thu te a sawi bawk.

He hunah hian Aizawl Smart City-a CEO C. Lalchhuangkima leh ICCC Engineer Johnson D Thianga te chuan ICCC chanchin tlangpui leh an hnathawh dan te Minister hi an lo hrilhfiah a, Integrated Command & Control Centre bun nan leh kum 5 chhunga a enkawl nan cheng vbc. 101 vel ruahman a ni a, a bun hna hi Bharat Heavy Electricals Limited (BHEL) pek niin anni hian Agreus Infotech Limited an thawh tir leh a. Nikum April ni 1 khan Union Home Minister Amit Shah in a hawn hnuin nikum (2023) July thla atangin a hman theih (go live) ta a ni.

ICCC-ah hian Control Room, Conference Room, Reception Area, Operator Room leh Data Centre changkang leh changtlung tak te a awm a. Aizawl khawpui chhung hmun hrang hrangah Surveillance Camera 76 bun niin Fixed Camera 236 bakah Pan Tilt Zoom (PTZ) 39 a awm bawk. Khawpui kawtchhuah pawimawh hmun 14-ah Automatic Number Plate Recognition (ANPR) Camera dah niin, Facial Recognition System khawpui chhung hmun 5-ah leh khawpui chhung hmun 4-ah Environmental Sensor dah a ni bawk.

Bawlhhlawh paih motor 140-te monitor-na tur GPS hmang Solid Waste Management Application Dashboard bakah Aizawl khawchhung chanchin hriat zung zung theihna Variable Messaging Display' hmun 4-ah dah a ni. Vantlang mipui tana a thlawna hman theih tur wifi hmun 15 ah bun tel a ni bawk.