Horticulture Fair 2024 hawnna neiin Best Horticulture Farmer te lawmman hlan an ni

Horticulture Fair, 2024 chu nimin khan Aijal Club Park-ah neih tan a ni a, he hunah hian District hrang hranga ‘Best Horticulture Farmer’ atana thlan mi 11 te hnenah chawimawina hlan nghal an ni.

Horticulture Fair 2024 hawnna hun hi Horticulture Minister Prof. Lalnilawma chuan hmanpuiin Horticulture Fair chu Horticulture Department leh an 'partner', kuthnathawktute tan kawng tam taka hlawkna thlentu nia a hmuh thu a sawi a. Thawhhona tha siamtu a nih bakah kuthnathawktute tana Department hmalakna rahchhuah mipuiin an lo hmuh a, an lo hriatpui theihna hmanrua tha tak nia a hriat thu sawiin, mipuiin heng hmalakna an lo hriatpui hian a thawktute tan phurna thar petu a nih thin thu a sawi bawk. Minister Prof. Lalnilawma chuan State pawn ah Mizo thei, thlai leh pangpar thar te phochhuak turin hmalak a nih mek thu a sawi a. Hralhchuak turin potential nei tha hle in, a Market luhchilh dan kawng hriat a pawimawh thu a sawi bawk.

He hunah hian Minister chuan District hrang hrang atanga Best Horticulture Farmer te hnenah lawmman sem nghalin, Kuthnathawktu hlawhtling lawmman la zingah kum 60 chuang mi pahnih an awm chu fakawm a tih rualin thalaite tan chona lian tak a ni, a ti a. An zinga MCA zir zo hmeichhia in farming hna eizawnna atan a thlang a, hlawhtlinna tha tak a hmu chho chu chhuanawm a tih thu a sawi bawk a. Best Horticulture Farmer atan hian Horticulture Technology, Infrastructure, components, scheme, etc. hmang tangkai leh hmasawnna nei thate thlan thin an ni.

Ni 3 chhung awh tur Horticulture Fair, 2024 hawnna inkhawm hi Horticulture Department Secretary K. Lalrinzuali chuan kaihruaiin Addl. Director M. Vanlalzami chuan Technical Repor a pe a. Kumin-a Horticulture Fair-ah hian Stall 202 hawn niin heng te hi Pangpar Stall 130, Thei tiak Stall 55, Pot Stall 9, Leitha Stall 3 leh Theitui/Pickle Stall 5 te a ni.

Mizoram a thei leh thlai chi hrang hrang chingtute, pangpar chingtute leh a zuar thinte, thei leh thlai atanga eitur vawnthat theih a siam lama tui mite pualin Horticulture Department chuan kum 2012 atang khan Horticulture Fair hi a lo buatsaih thin a. Thlai chingtute leh zuar thinte tan ‘Buyers & Sellers Meet’ lian tak a ni chho mek zel a. Kum 2012 atanga 2023 thlenga stall neituten an hlawh chhuah tawh zat chu Rs. 319,40,606 niin Hripui leng avangin kum 2020 leh 2021 khan Fair hi buatsaih a ni lo thung a. An buatsaih hmasak ber kum 2012-ah Stall 57 hawnga Rs. 17,39,306 an lakluh laiin kum 2019 kha Stall hawn tam ber niin 219 zet hawn a ni a, hemi kum hi an sum lakluh pawh a tam ber kum niin Rs. 66,41,330 zet an lalut bawk a ni.