Sawrkar hmasa in dinhmun sang zawka a dah Zirna In 340 te dinhmun en that leh rel a ni

School Education Minister Dr. Vanlalthlana chuan MNF Sawrkar laia Council of Minister-in ni 27.9.2023 a School 340 te dinhmun sang zawka a hlankai chu ni 18.6.2024-a Council of Minister thukhawm chuan en that leh an rel tih sawiin, dinhmun sanga dah phu tak takte chu dinhmun sanga dah turin an kalpui chhunzawm zel dawn tih a sawi bawk.

Nimin-a a Pisa-a thuthar thehdarhtute a kawmna ah Education Minister Dr. Vanlalthlana chuan September 27, 2023-a Council of Minister thukhawm in school 340 te dinhmun sang zawka dahna tur Memorandum lut a pawm tawh chu June 18, 2024-a Council of Minister thukhawm chuan a ngaihtuah leh thu sawiin, thil fel tawk lo tam tak a awm avangin Council of Minister thutlukna hmasa zawk chu thiatin en that leh tura tih a nih thu a sawi a. ZPM an sawrkar hnuah School 340-te dinhmun chawisanna tur chu 2024-25 State Annual Budget-ah an dah thu sawiin, “School 180 te provincialised na tur pawh DP&AR-ah thawn nghal a ni. Amaherawhchu, Upgradation hi kan kalpui tak tak dawn chuan Education Department leh Mizoram Sawrkarin Dan (Act & Rules) a neihsa te hman theih loh khawpa sawrkar hmasa Council of Ministers meeting-in a lo siam avangin ngaihtuah that tura chhawpchhuah leh a ngaih phah,” a ti.

Zirtirtu tam tak tih lungngaih leh politics-a inbeihna awm thei tur pawh ngun taka ngaihtuah tel a nih thu sawiin Education Minister chuan, “Felfai taka zirtirtu leh khawtlang chhawk zangkhaina ai maha inthlan hmachhawn tura tlin duh luat avanga thil tih ni ngeia ngaiah hian, dan kalkan theih loh thil a awm tak avangin tun hun hi kan thleng ta,” tiin sawrkarin pawi a tih thu a sawi bawk.

Education Minister chuan September 22, 2023-a Provincialization kalpui dan tur leh School Upgrade in a neih ngei ngei ngai tihchhuah chu September 27, 2023-a School Provincialized tura tih 180 zinga 41 chuan paltlang theiin School 139 chuan an paltlang theih loh thu leh School Provisional Adhoc Grant-in-aid tura hlankai 52 zinga 42 chuan criteria paltlangin 10 chuan an paltlang zawh loh thu bakah Lump sum Grand-in-aid tura tih School 108 zinga 60 in criteria an paltlang theih laiin, 48 chuan an paltlang lo tih a sawi bawk.

Sawrkar in September 22, 2024-a Notification a tihchhuah ah chuan Provincialized turah hian Building neih, kum 4 chhunga Board Exam-a pass 80% neih leh School naupang 90//80/60 nei tura a phut thu te; School 59 te Provisional Adhoc Grand-in-Aid a hlankai an nihna ah Dan behchhan engmah nei lovin tunah hian  Provisional Adhoc Grand-in-Aid Rules buatsaih mek a nih thu te pawh a sawi bawk.

Education Minister chuan Notification tihchhuahah tihsual palh thilah Higher Secondary School dawn tur zat (nuai 8) chauh tarlan niin, Middle leh High School (nuai 5)-te nen huang khatah dah an ni tih sawiin, “A taka kalpui theih a nih loh laiin Notification siamthat leh mai ai chuan Council of Minister Meeting-a chhawpchhuah leh atana tih a ni. Lump Sum GIA a hlankaina notification tihchhuah hi ni 29.9.2023 a ni a, kum 2023 MLA inthlan hun an puan a, Model Code of Conduct kenkawh a nih hmaa siamthat leh theih anih tho laiin engvanga siamthat loha awm ta nge tih chhanna hriat theih a ni lo,” a ti bawk.

Minister chuan School upgrade phu tak takte chu upgradation kalpui chhunzawm sak an nih dawn thu sawiin, danin a phut anga building pawh nei lo, result nei chhe lutuk-te leh School naupang neih tlem lutukna School zirtirtute leh a enkawltute chu tang lehzual sauh turin a ngen a. “Inthlan dawna, hnawhsaruma thil tih a nih avangin heng harsatnate hi kan tawk ta a ni tih hi min hriatthiam pui turin Zoram mipuite kan ngen tak meuh a ni,” tiin thutlukna siam thil awlawi lo tak a nih thu a sawi bawk.