AMC by-Election ah ZPM Candidate a tling

Aizawl Municipal Corporation (AMC) Ward No. XIX By-Election neih a vote tlate chu nimin khan Aizawl DC Pisa-ah chhiar niin Zoram People’s Movement (ZPM) Candidate Dr. C. Malsawmtluangi chu thlantlin a ni.

He inthlana Vote tla te nimin-a chhiar ah hian ZPM candiate Dr C. Malsawmtluangi hian vote 3544 hmuin amah hnaih bertu Mizo National Front (MNF) Candidate Dr. Lalrinzuali Hrahsel chuan vote 2502 a hmu thung a, an inthlauhna hi vote 1042 a ni a. Indian National Congress (INC) Candidate Effie Vanlalhmangaihi chuan vote 1170 hmuin BJP Candidate K. Vanlalruati chuan vote 102 a hmu a, NOTA-ah Vote 24 a tla bawk.

Tarlan tawh angin AMC Inthlanpui hnuhnung berah khan Ward No. XIX hi Hmeichhia te tana Seat hauh niin ZPM atangin Baryl Vanneihsangi chu thlantlin a ni a, ani hi nikum-a MLA Inthlanpui neih ah khan Aizawl South-III Bial atangin MLA-ah thlantlin a ni a, hei vang hian Corporator a nihna chu bansanin by-election neih a ni ta a. By-election-ah hian mi 7,342-in vote an thlâk a, Vote tla hi za zela 55.02 niin Polling Station 15-ah Vote nei mi 13,344 zinga 7,342 (mipa 3,407 leh hmeichhia 3,935)-te'n vote an thlak a ni.

AMC-ah hian Ward 19 awmin MNF chuan Corporatot 11 neiin Party mal in sawrkar an siam a, ZPM chuan Corporator 6 neiin INC in pakhat an nei bawk a, bye-election neih hma nena khaikhinin party tin ten Corporator an neih zat hi a danglam lo a ni.