Aikal la te ni 30 ralhmaa an hna thawk turin tih an ni

Sawrkar hnathawk aikal late chu ni 30 ralhmain an hna thawk chhunzawm tura hriattir niin, hna chhunzawm lo te chu dan loa chawl (unauthorised absence)-ah ngaih an ni ang.

Hemi chungchang ah hian DP&AR Secretary K. Lalthawmmawia chuan June 19, 2024 khan Office Memorandum a tichhuak a, sawrkar hnathawk zingah hun rei tak tak aikal chhawr an awm tih hriat a nih thu leh chutiang chu mahni hna ngaihthahna a nih thu te, mahni hna thawk tha duh lo te chu CCS (Conduct) Rules, 1964 hmanga hrem theih an nih thu te, aikal la te chungah sawrkar in dan anga action a lak dawn thu leh June 6, 2024-a Council of Minister thukhawmin aikal lak reng reng tihtawp vek turin thutlukna a siam thute tarlan a ni.

Sawrkar hnathawk aikal late chu hriattirna (Office Memorandum) chhuah atanga ni 30 chhungin an hna ah lêt vek tura hriattir an ni a; ni 30 chhung (July 19, 2024 hma)-a mahni hna zawm lo te chu dan loa chawl (unauthorized absence)-ah ngaih an ni dawn a, an chungah disciplinary action lak tur a ni ang. Aikal la mek, an hna thawh chhunzawm thei/duh lo te tan CCS (Pension) Rules, 1972 angin Voluntary Retirement, Invalid Pension leh Compulsory Retirement-te dil leh pek theih an ni dawn a; dan-a awm sa anga chawl thei lote tan 'Special Voluntary Retirement Scheme' siam tum a ni bawk.

Sawrkar hnathawk aikal la te ni 30 chhunga an hna chhunzawm tura hriattirna hian Mizoram sawrkar hnuaia thawk zawng zawng - Regular Employee, Co-Terminus (CSS), Part-Time, Casual, Work-Charged, Contract leh Provisional Employee-te a huam vek a, aikal la te chungchang ah hian a tul anga hma laa bawhzui turin DepartmentOoffice hotute hriattir niin an bawhzui dan (compliance report) chu hriattirna chhuah atanga ni 45 chhungin DPAR (ARW)-ah thehlut tura tih an ni bawk.

Aikal la ah hian damlo te leh natna khirh neite chu hriatthiamna a awm dawn a, dan angin chawlh (leave) an neih ang zawng zawng an lak phalsak a ni dawn a. Damlo leh natna khirh tuarte chu Medical Board atanga 'Medical Certificate of Incapacity’ laa thehlut tura chah an ni a, an dinhmun azirin ngaihnathiamna (special consideration) pek theih a ni ang.

Comments

Popular News (Last 30 Days)

Serchhip DCSO sawn a ni