Chief Minister in Union Home Minister hmuin Assam Rifles te an insawn ngei dawn tih a lo hrilh

Chief Minister Lalduhoma leh Union Home Minister Amit Shah te chu niminpiah tlai khan New Delhi-ah an inkawm a, Union Home Minister chuan Cyclone Remal avanga chhawmdawlna ngaihtuah a nih tur thu hrilhin, Assam Rifles te chu an insawn ngei dawn tih a lo hrilh bawk a ni.

Chief Minister Lalduhoma hian Central sawrkar thara mi pawimawh hrang hrang kawm tur leh All Finance Ministers' Meeting-a tel turin niminpiah khan Delhi a thleng a, Delhi a thlen hnu hian Home Minister Amit Shah nen inkawm nghalin Cyclone Remal in a Mizoram a chhiatna hrang hrang a thlen chungchangah Memorundum a thehlut a, Union Home Minister hian a hmuna endik tur Central Team a rawn tir chho ang a; report an thehluh veleh chhawmdawlna an ngaihtuah tur thu a lo hrilh a ni. Refugee chungchangah Central Sawrkarin chhawmdawlna pek an tiam tih pawh a lo hrilh bakah Assam Rifles sawnchhuah chungchang pawh sawidunin Home Minister chuan, thutlukna siamfel a ni tawh a, an insawn ngei dawn thu a lo hrilh a. Hemi bawhzui hian Chief Minister hian Mizorama a haw hunah Assam Rifles, Home, PHE, PWD leh P&E Department te Joint Meeting a ko dawn a ni.

Home Minister Amit Shah hian Chief Minister chu Mizoram Sawrkar hnuaia thawk tura Mizo Central Service Officers a dilte pawh tih hlawhtlin sak ngei a tum thu a lo hrilh a. Chief Minister-in August thla chhunga Mizoram tlawh tura a sawmna pawh tihhlawhtlin ngei a tum tur thu a hrilh a ni.

Home Minister nen an inkawm hnu hian Intelligence Bureau-a Director Tapan Deka chuan Chief Minister hi Mizoram House-ah kawmin Mizoram harsatna hrang hrangte an sawidun bawk.

Chief Minister Lalduhoma hian nimin khan Parliamentary Affairs leh Minority Affairs changtu Minister Kiren Rijiju chu a chenna In-ah hmuin, Mizoram hmasawnna tur hrang hranga hmachhawp an neih te thehlutin Union Minister hian rang taka hma an lo lak tur thu a sawi a. Hemi hnu hian Health leh Chemicals & Fertilizers changtu Minister JP. Nadda bakah Minister of State for External Affairs Pabitra Margherita te pawh a kawm bawk. Chief Minister hi Lok Sabha MP Richard Vanlalhmangaiha leh sawrkar mi pawimawh ten an tawiawm a ni.

Comments

Popular News (Last 30 Days)

Serchhip DCSO sawn a ni