Serchhip-ah National Statistics Day hman a ni
Serchhip District Research Officer (DRO) Lalthangmawia kaihhruaia ‘National Statistics Day 2024’ puala hun hman ah hian DRO Office-a UDC V. Laltlansanga chuan National Statistic Day lo hman tan dan sawiin, India ram a indan hlim khan thil tam tak siamthat ngai a awm thu leh, Sawrkar hruaitute leh mi thahnemngai ten ram siamthat dan nasa takin an ngaihtuah thu a sawi a, chutianga hmalakna kal zelah sawrkar laipui chuan Statistics pawimawh zia hriain kum 18 kalta khan Father of Statistics, Prof. Prasanta Chandra Mahalanobis piancham June ni 29 chu ‘National Statistics Day’ atan a lo puan thu leh kumtin he ni pual hian hun hman thin a nih thu a sawi a, kumin hian June ni 29 hi Sawrkar chawlh a nih avangin June ni 28-ah hman a ni ta zawk a ni.
Kumin-a National Statistic Day-ah hian ‘Use of Data in Decision Making’ tih chu thupui-ah hman niin Govt. Serchhip College Economics Department-a Asst. Professor Laldinpuia chu Resource Person atan hman a ni a, he hunah hian Brilliant Higher Secondary School leh Govt. Higher Secondary School Serchhip-a Economics zirlai leh Zirtirtute an tel a ni.
National Statistics Day vawi 18-na hi Mizoram khawpui hrang hrangah te pawh nimin khan hman a ni a, Aizawl-ah chuan State Planning Board Vice Chairman Dr. Kenneth Chawngliana hovin Economics & Statistics Conference Hall-ah hun hman niin Sawrkar Policy siam nan Statistics leh Data a tangkai thu leh, chutiang bawkin chu Policy chu a hlawhtling em tih enlet nan Statistics leh data bawk hman tangkai thiam a pawi-mawh thu a sawi a, Statistics leh Data dik kan neih theihna atan Village Profile siam tur a inruahman mek a nih thu a sawi bawk.
Comments
Post a Comment