Hmasawnna kalpui danah Science ngaihtuah a tul rualin Environment ngaihtuah tel a ngai niin sawi

School Education Minister Dr. Vanlalthlana chuan hmasawnna kalpui danah Science ngaihtuah a tul rualin Environment ngaihtuah tel a ngai tih a sawi.

State Council of Educational Research and Training (SCERT) leh National Council of Education Research and Training (NCERT) buatsaih ‘42nd State Level Science, Mathematics & Environment Exhibition and Edutech Festival 2024’ hawnna nimin-a SCERT tualzawl-a neih a hmanpuina ah Minister Dr. Vanlalthlana chuan Exhibition thupui ‘Science & Technology for Society’ tih chu a tak a hman tangkai a hun hle tih a sawi a. Khawvel changkanna in-a a kentel thiamna hmang thiam leh hmang tangkai hmasatu nih a pawimawh zia sawiin, chutiang a hmang tangkaitu nih hmasak tum chuan intlansiakna leh inelna nasa tak a awm thin thu a sawi a. Ram dangte ruala hmasawnna kawng kan zawh ve theih nan Mizo thalaite pawhin heng thiamna te hi kan chhawr thiam ve zel a tul thu a sawi bawk.

Khawvel sumdawnna lian ber ber thlanchhuah zinga a tam zawk chu Technology behchhan sumdawnnate an nih thu Education Minister chuan sawiin, Technology thar hman tangkai nachang hre lo company lian tak takte chu an tlukchhiat phah thin thu a sawi a. Khawvel in a buaipui mek ‘Artificial Intelligence’ pawh kan luhchilh a, kan zirchian a, hman tangkai kan tum ve a pawimawh thu a sawi. Hmasawnna hna kalpui dawn chuan hmasawnna awmze nei, inkhairual leh nakin hun lo la awm tur ngaihtuah chunga ruahmanna siam a pawimawh thu pawh sawiin, chutiang ngaihtuahna leh finna chherchhuahna hun a hmang turin he hun buatsaihtute leh chhimtute chu a chah bawk.

‘42nd State Level Science, Mathematics & Environment Exhibition’ ah hian District 5 atangin School 13 an tel a, Model/Exhibit 43 phochuakin heng Exhibit 43 te hi uluk tak a endik an nih hnuah National Level Exhibition-a tel tur thlanchhuah a ni ang. Hemi ruala neih ‘EduTech Festival 2024’ atan hian Stall 10 phochhuah a ni a, chungte chu Mizoram Scholarship Board, Mizoram State e-Governance Society, Buannel Studio Pvt. Ltd, Netsurf Internet Service, Reliance Jio Infocomm Ltd., NIELIT, Aizawl, Aricky Camera & Accessories, Click Studio, NeVA leh ICT, SCERT-te an ni a. Nimin-a a hawnna hun hi SCERT Joint Director Dr. Lalduhawmi Thomte chuan a kaihruai a ni.

Comments

Popular News (Last 30 Days)

Serchhip DCSO sawn a ni