Dan lova Sikret lakluh man sa tihchhiat a ni

Legal Metrology Department in Champhai kaltlanga dan lova ramdang atanga Sikret lakluh nikum chhunga an man cheng nuai 20 hu zet chu nimin khan tihchhiat a ni.

Heng Sikret te tihchiatna hun ah hian Champhai District Bawrhsap James Lalrinchhana chuan meizial zuk chu ruihhlo dang ti tura kailawn hmasa a nih a sawi bakah, chhiah chawi lova dan lova Sikret lakuhin ram sum leh pai dinhmunah nghawng nasa tak a neih thu a sawi a. Vantlang hmun pawimawh, puipunna leh zirna In leh a chhehvel ah meizial zuk leh zawrh khap tlat a ni tih sawiin, dan lova hmalakna do kawngah leh ruihhlo khawih that loh zia inzirir kawngah tun aia tanlak lehzual a tul thu a sawi bawk.

He hunah hian Legal Metrology-a Assistant Controller, V. Lalfakzuala chuan Legal Metrology (Packaged Commodities) Rules 2011 Rule 6 leh The Legal Metrology Act, 2009 section 18 in thuneihna a pek angin dan bawhchhiaa lakluh leh zawrh chhuah foreign Sikret-te man thin a nih thu a sawi a. Dan lova Sikret lakuh avangin cheng vbc. sing khat chuang Sikret atanga chhiah hmuh tur a kiam phah thu sawiin, “Dan lova lakluh Sikret te'n chhiah an chawi lova, declaration mumal an nei lova, Central Excise Duty leh GST chawi lo an nih bakah dan hnuaia zawrhchhuah thin Sikret hralhna chena a nghawng avangin man thin an ni”, a ti bawk.

Nimin-a Sikret tihchhiat te hi brand hrang hrang 7-a packet 39000 a ni a, tualchhung rate-a chhuta cheng nuai 20 hu vel niin Controller of Legal Metrology thupek leh District Magistrate hriatpuina in Mizoram Legal Metrology (Enforcement) Rules, 2010 hnuaia rule 19, sub-rule (4) & (6) tlawhchhanin tihchiat a ni.

Comments

Popular News (Last 30 Days)

Serchhip DCSO sawn a ni