MCAB Branch 28-na hawng

PWD Minister Vanlalhlana chuan nimin khan Mizoram Co-operative Apex Bank Ltd. (MCAB) Durtlang Branch a hawng.

MCAB Branch thar hawnna puala Inkhawm M. Suaka Auditorium, Durtlang-a neih ah PWD Minister chuan MCAB chu Mizoram Bank a nih anga khawtlang mipui ten tangkai taka hmang thin turin sawm a. Mizoram a Bank hrang hrang awm zingah an pawisa hmuh atanga Mizoram mipuite hnena luangchhuak tha ber chu Mizoram Cooperative Apex Bank a nih thu sawiin, Deposit atanga Loan pekchhuah tehna CD Ratio pawh 78% lai a nih thu a sawi.

Mizoram Co-operative Apex Bank Ltd. (MCAB) hi July ni 31, 1982-ah din a ni a, MCAB Durtlang Branch hi Apex Bank Branch 28-na niin ATM dah nghal tura ruahman leh reilote ah hawn theih beisei a ni a. Aizawl khawpui chhungah Branch 13 neiin Aizawl pawn ah Branch 15 an nei mek a ni. Hei bakah hian ATM Booth 35 neiin heng zingah hian Lunglei leh Mamit-a Mobile Van ATM te a tel a, kumin chhung hian Branch thar 8 hawn hman an tum bawk. MCAB hnuaiah a ngheta thawk mi 173 an awm mek a, Provisional Employee 30 awmin Private Security Guard 90 an chhawr bawk. MCAB hi Bank zinga Mizoram mipui leh sawrkar-in neitu nihna za-a za (100%) a neihna Bank awmchhun a ni a, Deposit vbc. 1,508 neiin Loan vbc. 1,172 pekchhuah a ni.